🔪 Taypey politsiyasi xavfsizlikni kuchaytirdi

Taypey shahri politsiyasi internet tarmog'ida Chiang Kay-shek xotira saroyida pichoq bilan uyushtirilishi mumkin bo'lgan ommaviy hujum haqida e'lon qilingan tahdidli xabar yuzasidan tezkor tergov harakatlarini boshladi. Huquq-tartibot idoralarining ma'lum qilishicha, mazkur holat bo'yicha maxsus guruh tuzilib, gumonlanuvchining internetdagi akkaunti va IP-manzilini aniqlash ishlari olib borilmoqda.

Shahar meri Chiang Van-anning ta'kidlashicha, mazkur tahdiddan so'ng yodgorlik saroyi atrofida xavfsizlik choralari sezilarli darajada kuchaytirilgan. Xususan, politsiya xodimlari saroy ma'muriyati bilan yaqin hamkorlikda hududda patrul nazoratini oshirgan va shubhali shaxslarni tekshiruvdan o'tkazmoqda.

Threads ijtimoiy tarmog'ida e'lon qilingan tahdidli xabarda kunduzi soat 14:00 da mazkur yodgorlik majmuasida pichoqbozlik sodir etilishi yozilgan bo'lib, uning oxirida jamiyat ayblangani haqidagi gaplar keltirilgan. Rasmiylar jamoat xavfsizligiga oid har qanday holatga o'ta jiddiy yondashilishini va xavfsizlikka tahdid soluvchi qilmishlar qonun doirasida qat'iy jazolanishini ma'lum qildi.