Kripto to'lovlar bo'yicha yangi ma'lumotlar e'lon qilindi 📊

Tallinda joylashgan NOWPayments kriptovalyuta platformasi olti oylik korporativ to'lovlar faoliyatini tahlil qiluvchi yangi empirik ma'lumotlarni e'lon qildi. Ushbu tadqiqot bizneslarga tezlik, tranzaksiya hajmi va xarajatlar samaradorligi asosida eng maqbul blokcheyn tarmoqlarini tanlashda ko'maklashish uchun TRON, BNB Smart Chain, Solana, Bitkoin va Ethereum tarmoqlarini o'zaro taqqoslaydi.

Taqdim etilgan ko'rsatkichlarga ko'ra, har bir blokcheyn tarmog'ining o'ziga xos afzalliklari mavjud. Xususan, Solana o'rtacha 1 daqiqayu 45 soniya tezlik bilan eng tezkor to'lov vaqtini qayd etdi va umumiy hajmbning 3.08 foizini hamda tranzaksiyalarning 3.86 foizini tashkil etdi. Pul mablag'lari hajmi bo'yicha TRON 43.69 foiz ulush bilan yaqqol peshqadam bo'ldi. BNB Smart Chain esa individual to'lov tranzaksiyalarining eng katta qismini, yani 48.23 foizini o'z zimmasiga oldi.

O'rganilgan davrda TRON, BNB Smart Chain, Ethereum, Bitkoin va Solana tarmoqlari jami to'lov hajmining 94.04 foizini va tranzaksiyalarning 77.84 foizini ta'minladi. BNB Smart Chain tranzaksiyalar soni bo'yicha TRONning 15.73 foizlik ko'rsatkichidan sezilarli darajada o'zib ketdi, biroq uning pul hajmidagi ulushi 21.75 foizni tashkil etdi. Bu tarmoq nisbatan kichikroq qiymatdagi, ammo yuqori chastotali o'tkazmalarni ko'proq amalga oshirganini ko'rsatadi.

Aksincha, TRON tarmog'i qiymat jihatidan ustun kelib, BNB Smart Chain ko'rsatkichidan ikki baravar ko'p mablag' o'tkazdi. Hisob-kitoblarga ko'ra, TRONdagi o'rtacha to'lov BNB Smart Chain tarmog'idagiga qaraganda qariyb 6.2 baravar yirikroq bo'lgan. Reytingda Ethereum hajm bo'yicha 18.84 foiz bilan uchinchi o'rinni egallab, tranzaksiyalarning 7.42 foizini bajardi. Bitkoin 6.68 foiz hajm va 2.60 foiz tranzaksiyaga egalik qildi.

Tezlik ko'rsatkichlari bo'yicha Solanadan keyin Bitkoin (2 daqiqayu 53 soniya), TRON (3 daqiqayu 08 soniya) va BNB Smart Chain (3 daqiqayu 13 soniya) keldi. Ethereum o'rtacha 5 daqiqayu 56 soniya bilan eng sekin tarmoq sifatida qayd etildi. Eng tez va eng sekin tarmoqlar orasidagi farq 4 daqiqayu 11 soniyani tashkil etdi, biroq barcha tarmoqlarda o'rtacha vaqt olti daqiqadan kam bo'ldi. NOWPayments tijorat direktori Keyt Lifshits kompaniya bunday ma'lumotlarga asoslangan yondashuvni qo'llashini ta'kidlaydi.