Vashingtonga Xitoydan kimlar boradi? 🚗

Xitoy rasmiylari mamlakat rahbari Si Szinpinning AQSh prezidenti Donald Tramp bilan 24-sentabr kuni Vashingtonda oʻtkaziladigan sammitiga hamrohlik qiladigan ishbilarmonlar delegatsiyasini shakllantirmoqda. Bloomberg va South China Morning Post nashrlarining xabar qilishicha, delegatsiya tarkibidan yirik texnologiya va avtomobilsozlik kompaniyalari rahbarlari oʻrin olishi mumkin.

Xususan, dunyoga mashhur elektromobillar ishlab chiqaruvchi BYD kompaniyasi asoschisi Vuan Chuanfu hamda smartfon va elektromobillar ishlab chiqaruvchi Xiaomi vakillari ushbu safarga borishi ehtimoli muhokama qilinmoqda. Biroq AQSh Xitoy avtomobillariga 100 foizlik boj joriy qilgani hamda uch oy oldin BYD'ni harbiy kompaniyalar roʻyxatiga kiritgani bu tashrifni alohida ahamiyat kasb ettiradi.

Nashrlarning yozishicha, yakuniy roʻyxat hali tasdiqlanmagan. Nomzodlar roʻyxati oʻzgarishi mumkinligi, ayrim tadbirkorlar hali ham Amerika vizasini kutayotgani va vazirliklar bu borada izoh bermagani aytilmoqda. Shuningdek, sun'iy intellekt markazlari uchun uskunalar tayyorlovchi Zhongji Innolight, AQShda ishlaydigan Bank of China hamda batareyalar ishlab chiqaruvchi CATL kompaniyalari ham delegatsiyaga kiritilishi mumkin boʻlgan nomzodlar qatorida tilga olingan.

Si Szinpin oxirgi marta 2015 yilda AQShga yirik biznes delegatsiyasi bilan borgan edi. Oʻsha paytda Alibaba asoschisi Jek Ma va Tencent rahbari Poni Ma kabi shaxslar delegatsiya tarkibida boʻlgan edi. Ekspertlarning ta'kidlashicha, Xitoy rahbarining xorijiy safarlariga yirik korxona rahbarlarini oʻzi bilan olib borishi kamdan-kam kuzatiladigan holat sanaladi.