Sentyabr oxirida Microsoft Word 40 yoshini nishonladi. Shu munosabat bilan tayyorlangan taqdimotdan so‘ng, tarmoqda Office LTSC 2024 Preview dasturining skrinshotlari paydo bo‘ldi. X ijtimoiy tarmog‘i foydalanuvchisi e’lon qilgan ushbu kadrlar tufayli kelasi yili Windows 12 chiqarilishi mumkinligi haqidagi muhokamalar boshlandi. Windows Insider dasturining rasmiy sahifasi bu xabarga «Kelajak haqiqatan ham yorqin» deya munosabat bildirdi. Bu to‘g‘ridan-to‘g‘ri tasdiq bo‘lmasa-da, avvalroq kompaniya har uch yilda yangi tizim chiqarishga qaytgani xabar qilingandi. Intel rahbari ham 2024 yilda yangilangan Windows taqdim etilishini ma’lum qilgan edi.