Raqamli platformalarni larza solayotgan "churning" tushunchasi 📺

Raqamli oqim xizmatlari olamida so'nggi paytlarda "churning" deb nomlangan yangi tushuncha keng muhokama qilinmoqda. Bu atama foydalanuvchilarning oylik xarajatlarini tejash maqsadida turli striming platformalari o'rtasida tinimsiz o'tishini anglatadi. Masalan, tomoshabin o'zi ko'rmoqchi bo'lgan maxsus kontent qaysidir platformada chiqqanda o'sha yerga obuna bo'ladi, biroq yaqin orada boshqa qiziqarli ko'rsatuv bo'lmasa, keyingi oydayoq obunasini to'xtatib, boshqa servisga o'tib ketadi. Bunday jarayon yiliga bir necha bor takrorlanishi mumkin.

Kompaniyalar uchun bu holat katta moliyaviy muammolarni keltirib chiqaradi. Tarqatilgan ma'lumotlarga ko'ra, bitta yangi foydalanuvchini jalb qilish qiymati 200 dollargacha yetishi mumkin, bu esa deyarli bir yillik obuna narxiga tengdir. Deloitte Insights hisobotiga ko'ra, AQShdagi foydalanuvchilarning qariyb 40 foizi oxirgi yarim yilda kamida bitta platformadagi obunasini bekor qilgan. Iqtisodiy sharoitlar og'irroq bo'lgan davlatlarda bu ko'rsatkich yanada yuqori bo'lishi ehtimoldan holi emas. Forbes ma'lumotlari 2023-yilda 164,7 million yangi obuna ochilganiga qaramay, bekor qilishlar soni 140,5 millionga yetganini ko'rsatadi. Antenna statistikasi esa ketgan foydalanuvchilarning atigi 10 foizi bir oy ichida qaytishini, bir yil ichida qaytganlar ulushi esa 41 foizni tashkil etishini ko'rsatmoqda.

Obunalarning bunchalik ko'p to'xtatilishi striming gigantlarini o'z strategiyasini o'zgartirishga majbur qilmoqda. Bugungi kunda ushbu muammoning oldini olish kompaniyalarning bosh vazifasiga aylangan. Shu sababli ishlab chiqarilayotgan kontentlar siyosati o'zgarib, sifatga emas, ko'proq miqdorga ustunlik berilmoqda. Netflix, Disney va Warner Bros. kabi yirik studiyalar "Friends", "The Office" yoki "Suits" kabi mashhur eski seriallar litsenziyasi uchun katta mablag' sarflayotgani ham bejiz emas. Ko'plab yangi shoular chiqishiga qaramay, aynan shunday uzun va tanish seriallar obunachilarni platformada ushlab turishda hal qiluvchi rol o'ynaydi. Mazkur raqobat muhitida Netflix boshqalarga nisbatan foydalanuvchilarni saqlab qolish bo'yicha eng past bekor qilish ko'rsatkichiga ega ekani bilan ajralib turmoqda.