DJI Air 3S droni yangi suratlarda 📸

DJI kompaniyasi 2024-yilning yoz oylari oxiri hamda kuz boshida bir nechta yangi dron modellarini taqdim etishga hoy-harakat qilmoqda. So'nggi haftalarda asosiy e'tibor Neo modeliga qaratilgan bo'lsa-da, avvalroq kompaniya Air 3 dronining davomchisi bo'lgan Air 3S ustida ham ishlayotgani ma'lum bo'lgandi. Shu bilan birga, yoz boshida tilga olingan yana bir yangi qurilma Mavic 4 haqida hozircha yetarlicha ma'lumot mavjud emas.

Taniqli dron inspektorlari @Quadro_news va @OsitaLV internetda Air 3S modelining yangi suratlarini ulashishdi. Ko'rinishidan, bu safargi rasmlar ichki prototiplarga emas, balki to'g'ridan-to'g'ri sotuvga chiqariladigan tayyor qurilmalarga tegishli. Demak, DJI kompaniyasi o'tgan yili taqdim etilgan Air 3 seriyasini yangilash arafasida turibdi.

Tarqalgan suratlardan birida yangi kameraning ayrim texnik jihatlariga oid ma'lumotlar ham ko'ringan. Xususan, Air 3S modeli dinamik diapazonni kengaytirish va hatto quyosh botishi manzaralarini suratga olish uchun 14 ta ekspozitsiya qiymatini qo'llab-quvvatlashi taxmin qilinmoqda. Shuningdek, qurilma 13,000 x 6,500 pikselgacha bo'lgan o'lchamda panoramali suratlarga olish imkoniyatiga ega bo'ladi.

Biroq, dronning asosiy linzalari o'zgarishsiz qolgan. Xususan, Air 3S ham avvalgi Air 3 kabi 24 mm asosiy va 70 mm telefoto kameralar bilan jihozlanadi. Internetda qurilmaning jonli suratlari paydo bo'la boshlaganini hisobga olsak, uning qolgan texnik xususiyatlari ham tez orada oshkor etilishini kutish mumkin. Afsuski, hozircha yangi dronning rasmiy taqdim etilish sanasi sir saqlanmoqda.