NATO bosh kotibi: Rossiya va Xitoy dollarga zarba bermoqda 🌐

Ruminiyaning Defense Romania nashri NATO bosh kotibi Yens Stoltenbergning Amerika Qo‘shma Shtatlariga qilgan ko‘p kunlik tashrifi tafsilotlariga bag‘ishlangan qiziqarli tahliliy maqolani eʼlon qildi. Mazkur material Politico nashri maʼlumotlariga asoslangan bo‘lib, unda AQSh qonunchilarini Ukrainani qo‘llab-quvvatlashda davom etishga ko‘ndirish urinishlari haqida so‘z boradi.

Tashrif davomida NATO rahbari AQSh bo‘lajak prezident saylovlarida kim g‘alaba qozonishidan qatʼi nazar, alyansga sodiq qolishiga kafolat berdi. Stoltenberg Kongressda anʼanaviy ravishda ikki partiya ham alyansni qo‘llab-quvvatlashini taʼkidlab, hatto Donald Tramp qayta prezident etib saylangan taqdirda ham mamlakatni NATOdagi ishtirokidan mahrum qilmasligiga ishonch bildirgan. Uning so‘zlariga ko‘ra, Trampning tanqidlari butun tashkilotga emas, balki 2014 yildagi mudofaa xarajatlarini YaIMning 2 foiziga yetkazish bo‘yicha vaʼdasini bajarmagan ayrim aʼzo davlatlarga qaratilgan edi.

Maqolada qayd etilishicha, Stoltenbergning ushbu safari va bayonotlari amerikalik qonunchilarni tashvishga solayotgan bir qator dolzarb masalalarni bir butunlikka bog‘lashga urinish bo‘lgan. U Rossiya, Xitoy, Eron va Shimoliy Koreya tobora jipslashib borayotganini va bu davlatlar sanksiyalar hamda bosimlarni chetlab o‘tib, AQSh dollariga asoslangan xalqaro moliya tizimini izdan chiqarayotganini ochiq eʼtirof etgan.

Nashr muallifining fikricha, mazkur bayonotlar Vashington boshchiligidagi global ustunlikning zaiflashib borayotganidan xavotir alomatidir. Shu bilan birga, maqolada AQSh o‘nlab yillar davomida o‘z imkoniyatlaridan ortiqcha yashab kelgani va tashqi qarzi 2024 yil boshida astronomik miqdorga yetgani eslatib o‘tilgan.