Samsung narxlarni oshirishi tufayli iPhone qimmatlashishi mumkin 📱

Kelgusi avlod iPhone, iPad va Mac qurilmalarining narxlari yanada oshishi mumkin. Bung asosiy sabab sifatida Samsung kompaniyasining Apple’ga sotiladigan xotira chiplari narxini qayta ko‘rib chiqqani va oshirgani ko‘rsatilmoqda. Agar ushbu o‘zgarishlar o‘z tasdig‘ini topsa, yuzaga kelgan ta’sir faqatgina Apple bilan cheklanib qolmaydi. DRAM xotirasi va NAND flesh saqlash qurilmalari narxining qimmatlashishi 2027 yildan boshlab boshqa texnologik mahsulotlarga ham o‘z ta’sirini o‘tkazishi mumkin.

Sanoatdagi manbalar ma’lumotiga ko‘ra, Samsung va Apple xotira chiplarini qimmatroq narxlarda yetkazib berish bo‘yicha yangi kelishuvga erishgan. Gap iPhone, iPad va MacBook kabi qurilmalarda muhim o‘rin tutuvchi LPDDR5X operativ xotirasi hamda ichki xotira uchun mo‘ljallangan NAND flesh xotirasi haqida bormoqda. Ko‘rsatkichlarga ko‘ra, 2027 yilning birinchi choragidan boshlab Apple har bir gigabit LPDDR5X uchun 2 dollar, NAND flesh uchun esa 0,33 dollar to‘lashga rozi bo‘lgan.

Taqqoslash uchun, 2026 yilning uchinchi choragida RAM narxi har bir gigabit uchun 1,50 dollarni, NAND flesh esa 0,26 dollarni tashkil etgan edi. Bu shuni anglatadiki, LPDDR5X xotirasi taxminan 33 foizga, NAND flesh esa 27 foizga qimmatlashmoqda. Garchi bir gigabitdagi farq kichik ko‘rinsa-da, millionlab qurilmalar miqyosida hisoblanganda bu yakuniy xarajatlarga jiddiy ta’sir ko‘rsatadi.

Asosiy qism qimmatlashganda, ishlab chiqaruvchilar xarajatlarni o‘z zimmalariga olishi yoki narxni iste’molchiga yuklashi kerak bo‘ladi. Apple holatida bu kelgusi avlod qurilmalari narxining yanada oshishiga olib kelishi mumkin. AQSh bozorida iPhone 18 Pro va iPhone 18 Pro Max modellari avvalgi avlodga nisbatan 100 dollarga qimmatroq chiqqan edi.

Apple dunyodagi eng yirik xotira xaridorlaridan biri bo‘lib, hatto u ham Samsung shartlarini qabul qilgan bo‘lsa, bu boshqa brendlar uchun ham ogohlantirish bo‘lishi mumkin. Natijada Android smartfonlari, noutbuklar, planshetlar va boshqa elektronika toifalaridagi qurilmalar ham qimmatlashish ehtimoli mavjud.