Yangi qonunchilik va islohotlar xabarlari 📋

Mamlakatimizda iqtisodiyot, ta’lim, qishloq xoʻjaligi va boshqa sohalarni rivojlantirishga qaratilgan bir qator muhim qarorlar hamda normativ hujjatlar qabul qilindi. Xususan, elektrotexnika sohasidagi yirik investorlarni jalb qilish hamda mahalliy ishlab chiqaruvchilarni qoʻllab-quvvatlash maqsadida maxsus soliq va moliyaviy imtiyozlar belgilab qoʻyildi.

Ta’lim yoʻnalishida esa yangi oʻquv yilidan boshlab davlat oliy oʻquv yurtlarining kunduzgi boʻlimida oʻqiyotgan pedagoglarning farzandlari uchun kontrakt summasining 30 foizi miqdorida chegirma taqdim etiladi. Buning uchun internet orqali ariza topshirish kifoya qiladi. Shuningdek, ta’lim muassasalarida bolalarni har qanday zoʻravonlik va kamsitishlardan himoya qilish kuchaytirilib, huquqbuzarlik sodir etgan pedagoglar ma’muriy javobgarlikka tortiladi va bir yilga kasbiy faoliyatdan chetlashtiriladi.

Qishloq xoʻjaligi va suv resurslaridan foydalanish sohasida ham yangiliklar joriy etilmoqda. Bogʻdorchilik va vinochilik ilmiy-tadqiqot instituti huzurida "in vitro" usulida oʻsimliklar yetishtirish va uzumning yangi navlarini koʻpaytirishga moʻljallangan tajriba stansiyasi tashkil etilmoqda. Bundan tashqari, "Suvxoʻjaliknazorat" inspeksiyasiga suvni tejash texnologiyalari va resurslar monitoringini olib borish uchun uchuvchisiz uchish apparatlarini ishlatishga ruxsat berildi.

Tibbiyot tizimini isloh qilish doirasida shifokorlar va farmatsevtlarni davlat roʻyхatidan oʻtkazish bosqichma-bosqich boshlanadi. Shuningdek, tibbiy kadrlar tayyorlash jarayoni "5+1" modeliga oʻtkazilib, klinik ordinatura tugatiladi va tor mutaxassisliklar rezidentura orqali oʻqitiladi. Shu bilan birga, Markaziy bank boshqaruvi yigʻilishida asosiy stavka miqdori oʻzgarishsiz qoldirilib, yillik 14 foiz darajasida belgilandi.