📈 Bitkoin narxi 85 000 dollardan oshdi

Kriptovalyuta investorlari uzoq kutgan ijobiy o'zgarishlar nihoyat boshlandi. Oylar davomida kuzatilgan pasayishdan so'ng, bozor mutaxassislari bitkoin uzoq muddatli o'sish tendensiyasiga qaytganini ta'kidlamoqdalar. So'nggi bir hafta ichida raqamli aktivlar bozoriga sarmoyadorlarning qaytishi fonida keskin rall kuzatildi.

Joriy yilda 59 000 dollargacha tushib ketgan asosiy kriptovalyuta dushanba kuni yana 5 foizga oshib, 85 000 dollar chegarasidan o'tdi. Bu bitkoinning joriy yil yanvar oyi oxiridan buyon ilk bor ushbu ko'rsatkichdan oshishidir. Mutaxassislar buni oylab davom etgan "kripto qishi" yakunlanganining so'nggi belgisi sifatida baholamoqda. Bitwise Asset Management bosh investitsiya direktori Mett Hougan bu davrni "kripto bahori" deb atab, tarixdagi eng kuchli va uzoq davom etadigan buqa bozori bo'lishini taxmin qildi.

Grayscale tadqiqotlar bo'limi rahbari Zax Pandl ham iyun oyi oxirida 58 000 dollar atrofida eng quyi nuqtaga yetgan bitkoinning ayiq bozori bosqichi ortda qolganini bildirdi. U kompaniya o'z mijozlariga sarmoya kiritish uchun ijobiy signal berayotganini ta'kidladi.

Narxlarning keskin oshishiga turtki bo'layotgan asosiy omillardan biri bu regulyativ optimizmdir. O'tgan oy Oq uydagi sammitda Prezident Donald Tramp raqamli aktivlar uchun huquqiy baza yaratishga qaratilgan CLARITY qonun loyihasini qo'llab-quvvatlagan edi. Garchi loyiha Senatdan o'tmagan bo'lsa-da, Qimmatli qog'ozlar va birjalar komissiyasi besh yillik muddatga tokenlashtirilgan aksiyalar savdosiga ruxsat berdi, shuningdek, Tovarlar va fyucherslar savdosi komissiyasi yangi tartibga solish taklifini kiritdi.

Ikkinchi asosiy omil sifatida chakana va institutsional talabning kuchayishini ko'rsatish mumkin. Bloomberg ma'lumotlariga ko'ra, AQShdagi спот bitkoin ETF'lari payshanba va juma kunlari 593 million dollar mablag' jalb qildi. Shuningdek, derivativlar bozoridagi ochiq qiziqish ham o'sib, oxirgi yetti kun ichida 8 foizga oshib, 55,7 milliard dollarni tashkil etdi.