"Sheldoning bolaligi" spin-offi kuzda chiqadi 🎬

"Katta portlash nazariyasi" sitkomining mashhur prikveli bo‘lgan "Sheldoning bolaligi" serialining ijodkorlari muxlislarga navbatdagi yangilikni taqdim etishdi. Ma’lum qilinishicha, bosh qahramanning katta akasiga bag‘ishlangan maxsus spin-off shu yilning kuz oylarida tomoshabinlarga taqdim etiladi. Yangi teleloyihaga "Jorji va Mendining birinchi nikohi" deya nom berildi.

Yangi hikoya yettinchi faslda o‘z nihoyasiga yetgan "Sheldoning bolaligi" serialining to‘g‘ridan-to‘g‘ri davomi bo‘ladi. Jorji va Mendi ishtirokidagi mazkur syujet Texas shtatida kechib, unda qahramonlarning o‘z farzandini birgalikda voyaga yetkazayotgan paytdagi hayoti tasvirlanadi.

Asl serial — "Sheldoning bolaligi" esa Sheldonning o‘tmishi va uning oilasiga bag‘ishlangan bo‘lib, unda bosh rolni Ian Armitej ijro etgan edi. Ushbu loyihaning suratga olish ishlari aprel oyining ikkinchi yarmida yakuniga yetgan bo‘lib, uning so‘nggi qismi 16-may kuni efirga uzatiladi. Mazkur final qismida "katta" Sheldon rolida Jim Parsons yana namoyon bo‘ladi. Bungacha aktyor kadrlar ortidan turib voqealarni hikoya qilib beruvchi vazifasini bajarib kelgandi, ba’zi sahifalarda unga "Katta portlash nazariyasi"ning boshqa qahramonlari ham qo‘shilgan edi.

Mazkur koinot doirasida yana bir loyihaning paydo bo‘lishi kutilmagan holat emas. "Sheldoning bolaligi" tomoshabinlar e’tiboriga tushib, ijobiy baholarga sazovor bo‘ldi hamda CBS telekanalining yirik xit loyihalaridan biriga aylandi. Mazkur shou 2017-yilda efirga chiqqan bo‘lsa-da, fasllari soni bo‘yicha asl "Teoriya"dan o‘zib keta olmadi — chunki original serial jami 12 fasldan iborat edi.

Yangi serialni yaratish ustida ham avvalgi loyihada ishlagan Chak Lorre, Stiven Molaro va Stiv Holland bosh-qosh bo‘lishdi. Shuningdek, yangi shouda bosh rollarni yana Montana Jordan hamda Emili Osment ijro etishi tasdiqlandi.