1 mln dollar nafaqa puli AQShda necha yilga yetadi? 💰

AQShda nafaqa uchun jamg'arilgan 1 million dollar mamlakatning birorta ham shtatida 25 yillik xarajatlarni qoplash uchun yetarli emasligi ma'lum bo'ldi. Charles Schwab tomonidan e'lon qilingan tadqiqotga ko'ra, amerikalik ishchilar nafaqaga chiqish uchun o'rtacha 1,8 million dollar talab etiladi deb hisoblashadi. Empower ma'lumotlariga ko'ra, 65-70 yoshdagi fuqarolarning o'rtacha 401(k) balansi 185,858 dollarni tashkil etadi, biroq 1 million dollardan ortiq mablag' jamg'arganlar ham pul qancha vaqtga yetishini hisobga olishi lozim.

GoBankingRates agentligi har bir shtatda 1 million dollar qancha muddatga yetishini o'rganib chiqdi va yuqori xarajatli hududlarda bu mablag' tez tugashini aniqladi. Xususan, Gavayi, Nyu-York va Kaliforniyada yashovchi nafaqaxo'rlar yiliga 5 000 dollardan ortiq oziq-ovqat va 20 000 dollardan ziyod uy-joy xarajatlariga duch kelishadi, natijada million dollar 15 yil ichida yo'q bo'lib ketadi.

Biroq bu mablag' G'arbiy O'rta va Janubiy shtatlarda ancha uzoqroqqa yetadi. Kansas, Oklahoma va Missisipi kabi hududlarda xarajatlar pastligi sababli jamg'arma 21 yil yoki undan ko'proq muddatga xizmat qilishi mumkin. Xususan, CreditDonkey hisobotiga ko'ra, oziq-ovqat va uy-joy narxlari kabi to'qqizta omilni inobatga olgan holda Missisipi shtati nafaqaga chiqish uchun 1-o'rin sifatida e'tirof etilgan.

Tadqiqot natijalariga ko'ra, jamg'armalar eng uzoq vaqt saqlanib qoladigan oltita shtat qatoriga Jorjiya, Ayova, Alabama, Kansas, Oklahoma va Missisipi kiradi. Masalan, Jorjiyada yillik umumiy xarajatlar 46 353 dollarni tashkil etib, pul 21 yildan ortiq vaqtga yetadi. Alabamada esa umumiy yillik xarajatlar 45 414 dollarni tashkil qilib, mablag' 22 yilga yaqin muddatga yetishi aniqlangan.