AMD mahsulotlari narxi qimmatlashadi 📈

Amerikaning AMD kompaniyasi o'z hamkorlarini joriy yilning to'rtinchi choragida ayrim markaziy protsessorlar qiymatini o'rtacha 10 foizga oshirish niyatida ekanligi haqida xabardor qildi. Ushbu narx siyosatining o'zgarishi kompaniya uchun protsessor hamda grafik chiplarini yetkazib beruvchi Tayvanning TSMC ishlab chiqaruvchisida xarajatlar ko'paygani bilan izohlanmoqda. Avvalroq TSMC kompaniyasi ham o'z navbatida buyurtmachilarga xizmat ko'rsatish va ishlab chiqarish qiymati qimmatlashishi haqida xabar bergan edi.

Kutilayotgan narx o'zgarishlari sun'iy intellekt yo'nalishidagi tezlatgichlarga, oddiy foydalanuvchilar uchun mo'ljallangan videokartalarga hamda ona platalar uchun mo'ljallangan markaziy protsessorlarga o'z ta'sirini ko'rsatishi mumkin. Biroq, AMD kompaniyasi tomonidan Ryzen seriyali protsessorlarning narxi aynan 10 foizga oshishi to'g'risida hozircha hech qanday rasmiy bayonot berilmagani aytilmoqda.

Mazkur jarayon fonida raqobatchi Intel kompaniyasi ham o'z mahsulotlari narxini o'zgartirishga hozirlik ko'rayotgani ma'lum bo'ldi. Xususan, Intel joriy yilning 5-oktabridan boshlab shaxsiy kompyuterlar uchun mo'ljallangan protsessorlarning chakana narxlarini navbatdagi marta 10 foizga oshirishni rejalashtirgan. OAV ma'lumotlariga ko'ra, shuningdek, daromadliligi past bo'lgan Small Core deb nomlanuvchi mahsulotlar liniyasini ishlab chiqarish to'xtatilishi ehtimoli ham istisno qilinmayapti.