Janubiy Koreya voni uchun 24 soatlik tarmoq ishga tushdi 🇰🇷

Koreya Banki xorijiy investorlar uchun milliy valyuta – von hisob-kitoblarini mamlakat an'anaviy bank ish vaqtidan tashqarida ham amalga oshirish imkonini beruvchi ilk 24 soatlik tarmoq sinovini boshladi. 21-sentabr kungi e'lon qilingan ma'lumotlarga ko'ra, Koreya Bankining xalqaro von pul o'tkazmalari tarmog'i sinov rejimida ish boshlagan bo'lib, bu Janubiy Koreyaning offshor hududlardagi von valyutasiga kirish imkoniyatlarini yaxshilash rejasining bir qismidir.

Ushbu dastlabki sinov bosqichida KB Kookmin Bank, Woori Bank, Hana Bank va Shinhan Bank ishtirok etmoqda. Tizim ish kunlari davomida 24 soat davomida ishlaydi, dam olish va bayram kunlari esa faoliyat to'xtatiladi. Tarmoq ish boshlagan dushanba kuni tongda esa taxminan 1,4 milliard von qiymatidagi ilk sinov tranzaksiyasi muvaffaqiyatli amalga oshirildi.

Yangi tizimdan foydalanayotgan xorijiy investorlar Koreya moliya muassasalarida alohida hisob ochmasdan turib, ro'yxatdan o'tgan xorijiy institutlar – RFI-K orqali von tranzaksiyalarini yakunlashlari mumkin. Yangi qoidalar xorijiy institutlarga Koreya valyuta banklarida umumiy hisoblar ochish hamda Markaziy bank tarmog'i orqali hisob-kitoblarni amalga oshirish huquqini beradi. Moliyaviy idoralarning ta'kidlashicha, mazkur o'zgarishlar offshor von operatsiyalarini vaqt va joylashuvga qaramligini kamaytirishga qaratilgan hukumat rejasining tarkibiy qismidir.

Sinov davri o'tgach, xorijiy banklarni tarmoqqa to'liq qo'shish va tizimni rasman joriy etish 2027-yil yanvar oyiga rejalashtirilgan. Shuningdek, "Project Agorá" va "Project Hangang" loyihalari alohida ravishda tokenlashtirilgan zaxiralar, depozitlar va transchegaraviy hisob-kitob infratuzilmasini sinovdan o'tkazishda davom etmoqda. Koreya Bankining fikricha, ushbu yangi tarmoq xorijliklarning von infratuzilmasidan foydalanish imkoniyatini yaxshilab, oxir-oqibat valyutaning xalqaro mavqeini yuksaltirishga xizmat qiladi.