Xbox Breaker: Yangi pultlar seriyasi 🎮

Microsoft o‘zining mashhur o‘yin konsollari uchun mo‘ljallangan Xbox Wireless Controller Breaker deb nomlangan maxsus seriyasini e’lon qildi. Ushbu yangi oila o‘z ichiga uchta o‘ziga xos dizayndagi qurilmani oladi: Heart Breaker, Ice Breaker va Storm Breaker. Kompaniya tarixida ilk bor uchta maxsus nashrdagi pult bir vaqtning o‘zida bozora chiqarilmoqda va ularning har biri o‘ziga xos xususiyatlarga ega.

Seriyadagi Ice Breaker modeli muzdek moviy rangdagi yaltiroq va shaffof elementlari bilan ajralib turadi. Storm Breaker esa qora, oq, kulrang hamda kumush ranglarni o‘z ichiga olib, yorug‘lik tushganda o‘zgacha jilolanuvchi naqshlarni namoyish etadi. Heart Breaker modeli esa pushti, binafsha va ko‘k ranglarning yorqin uyg‘unligi bilan o‘ziga jalb qiladi hamda o‘ziga xos shaffof ustki qismga ega.

Barcha uchta model Xbox Wireless yoki Bluetooth orqali Xbox Series S|X, Xbox One, Windows kompyuterlari, shuningdek Android va iOS qurilmalariga ulanishi mumkin. Shuningdek, foydalanuvchilar quloqchinlarni ulash uchun an’anaviy 3.5 mm raz’emdan foydalanishlari va Xbox Accessories ilovasi orqali tugmalarni o‘zlariga moslab sozlashlari mumkin.

Ushbu seriyadagi barcha pultlarning tavsiya etilgan narxi 79.99 AQSh dollarini tashkil etadi. Bugundan boshlab dunyoning tanlangan bozorlarida mazkur qurilmalar uchun oldindan buyurtma berish imkoniyati ochildi va ularning savdosi 9-sentyabr kuni boshlanishi rejalashtirilgan.