BlackRock va Nasdaq SEC vakillari bilan uchrashdi 📈

Dunyodagi eng yirik aktivlarni boshqarish kompaniyasi hisoblangan BlackRock hamda Nasdaq birjasi vakillari AQSh Qimmatli qog‘ozlar va birjalar komissiyasining Savdo va bozorlar bo‘limi xodimlari bilan navbatdagi ishchi uchrashuvini o‘tkazdilar. Mazkur muloqot muassasaning spot Bitcoin ETF fondini ochish bo‘yicha kiritgan rasmiy arizasini muhokama qilishga bag‘ishlandi.

Komissiya tomonidan e'lon qilingan eslatmaga ko'ra, muzokaralarda BlackRock kompaniyasining raqamli aktivlar bo'limi rahbari Robert Mitchnick va ETF jamoasi vakillari ishtirok etgan. Shuningdek, Nasdaq tomonidan vitse-prezident Jozef Kusik, aksiyalar va birja mahsulotlari rahbari Giang Bui hamda ro'yxatga olish bo'yicha mas'ul Alison Doyle qatnashgan. Komissiya delegatsiyasiga esa bo'lim direktor o'rinbosarlari Devid Shillman va Erik Juzenas boshchilik qilgan.

Uchrashuv davomida Nasdaq birjasining iShares Bitcoin Trust fondi aksiyalarini ro'yxatga olish va savdo qilish bo'yicha taklif etilgan qoida o'zgarishi atroflicha ko'rib chiqilgan. Ushbu tartib-qoidalar tovarlarga asoslangan trest aksiyalarini birjaga kiritish, ularning dastlabki va keyingi talablarga muvofiqligini ta'minlash mezonlarini o'z ichiga oladi.

Mazkur muloqot BlackRock o'zining S-1 shaklidagi arizasiga o'zgartirish kiritganidan keyin amalga oshirildi. Ushbu o'zgarishlarga ko'ra, fond yangi IBIT tikerini olgan hamda faqat naqd pul yordamida ishlaydigan tizimga o'tkazilgan. Bu shuni anglatadiki, fondning yangi aksiyalari faqat naqd mablag'lar evaziga yaratiladi va kriptovalyutaning o'zidan foydalanilmaydi.

Bu BlackRock kompaniyasining o'zining Bitcoin ETF arizasi yuzasidan regulyator bilan o'tkazgan uchrashuvlarining uzluksiz davomi hisoblanadi. Joriy yilning noyabr oyida ham tomonlar Uoll-strit banklarining ushbu jarayonda ishtirokini osonlashtirishga qaratilgan qoida o'zgarishlarini muhokama qilishgan edi.

Eslatib o'tamiz, BlackRock joriy yilning iyun oyida spot Bitcoin ETF uchun ariza topshirib, butun kriptovalyuta bozorida katta shov-shuv keltirib chiqargan edi. Dunyodagi eng yirik boshqaruv kompaniyasining mazkur poygaga qo'shilishi yillar davomida barcha arizalarni rad etib kelgan regulyatorning bu safar ijobiy qaror chiqarishiga bo'lgan umidlarni qaytadan jonlantirdi.

2024-yilning yanvar oyida bir nechta arizalar bir vaqtning o'zida ma'qullanishi mumkin bo'lgan muddat yaqinlashib kelmoqda. Shu sababli, regulyator va kompaniyalar o'rtasidagi bunday uchrashuvlar kelgusi yilda AQShda ilk spot Bitcoin ETF tasdiqlanishiga oid optimizmni oshirmoqda. Bloomberg Intelligence va JPMorgan tahlilchilari yanvar oyida kamida bitta shunday mahsulot ma'qullanishi ehtimoli yuqori ekanini ta'kidlamoqda.