NFL klubi egasi muxlis ustiga ichimlik uloqtirdi 🏈

NFL chempionatida ishtirok etuvchi "Carolina Panthers" futbol klubining milliarder egasi Devid Tepper jiddiy tanqidlar ostida qoldi. Yakshanba kuni Jeksonvill shahridagi "EverBank Stadium" arenasida bo'lib o'tgan uchrashuv vaqtida u raqib jamoa — "Jacksonville Jaguars" muxlisining ustiga ichimlik uloqtirgani aytilmoqda.

Ijtimoiy tarmoqlarda keng tarqalib ketgan videotasvirda milliarder o'z VIP lojasi derazasidan stakandagi suyuqlikni tashqariga irg'itib, so'ng stakanni qattiq urib qo'ygani yaqqol ko'rinadi. Bu holat pastda turgan "Jaguars" muxlisining g'azab bilan yuqoriga qarashiga sabab bo'lgan. Ushbu mojaro o'yinning so'nggi daqiqalarida "Panthers" chorak himoyachisi Brays Yang to'pni raqibga boy berib qo'yganidan keyin sodir bo'lgani taxmin qilinmoqda.

NFL vakili Tim Shlittner matbuotga bergan qisqa bayonotida liga rahbariyati mazkur videodan xabardor ekanligini tasdiqlagan, biroq hozircha boshqa qo'shimcha izoh bermasligini ma'lum qilgan. Uchrashuvda "Carolina Panthers" 26-0 hisobida qaqshatqich mag'lubiyatga uchradi va joriy mavsumdagi natijasi 2 g'alaba hamda 14 mag'lubiyatni tashkil etmoqda.

Ma'lumotlarga ko'ra, bu Devid Tepperning jamoa natijalaridan noroziligini ko'rsatgan ilk bunday ommaviy holati emas. Noyabr oyida ham "Tennessee Titans" jamoasidan uchralgan mag'lubiyatdan so'ng, Tepper kiyinish xonasidan chiqishda baqirib, haqoratli so'z ishlatgani ko'rilgan edi.

Devid Tepper 2018 yilda mazkur klubni irqchilik va shilqimchilik ayblovlariga uchragan sobiq egasi Jerri Richardsonvdan sotib olib, unga egalik qilib kelmoqda. "Bloomberg" ma'lumotlariga ko'ra, milliarderning boyligi taxminan 17,5 milliard dollarga baholanmoqda. "Panthers" keyingi o'yinini yakshanba kuni o'z uyida "Tampa Bay Buccaneers" jamoasiga qarshi o'tkazishi rejalashtirilgan.