Apple xotira uchun 40% ko‘proq to‘laydi 📱

Jahon bozorida tezkor va doimiy xotira qurilmalari narxining o‘sish tendentsiyasi davom etmoqda. Xitoyning nufuzli iqtisodiy portali Jiemian News ta'minot zanjiridagi manbalarga tayanib tarqatgan xabarga ko‘ra, texnologiya giganti Apple Samsung kompaniyasi bilan 2027 yilning dastlabki uch oyi uchun shartnoma shartlarini kelishib olgan. Ushbu kelishuvga binoan, butlovchi qismlar qiymati 2026 yilning uchinchi choragidagi ko‘rsatkichlardan qariyb 30 dan 40 foizgacha yuqori bo‘lishi kutilmoqda.

Yangi shartlarga ko‘ra, Samsung kelgusida har bir gigabayt DRAM uchun deyarli 2 AQSh dollari, har bir gigabayt NAND-flash xotirasi uchun esa taxminan 0,33 dollar talab qilmoqda. Taqqoslash uchun, o‘tgan yilning uchinchi choragida LPDDR5X xotirasining gigagabyti 1,50 dollar atrofida, NAND esa 0,26 dollar atrofida baholangan edi. Apple 2027 yil boshiga mo‘ljallangan mazkur yangi moliyaviy shartlarni allaqachon qabul qilgani aytilmoqda, biroq kompaniya buni rasman tasdiqlagani yo‘q.

Mutaxassislarning fikricha, sun'iy intellekt sanoatining jadal rivojlanishi va yirik ma'lumotlar markazlarining ulkan ehtiyoji sababli xotira qurilmalari taqchilligi yuzaga kelgan. TrendForce tahlil markazi ma'lumotlariga ko‘ra, Samsung, SK Hynix va Micron kabi yirik ishlab chiqaruvchilarning kelgusi yil uchun ishlab chiqarish quvvatlari allaqachon to‘liq band qilingan. Shuningdek, mijozlar talab qilingan NAND hajmining faqatgina 60-70 foizini olishi mumkinligi aytilmoqda.

Bu jarayon Apple uchun noqulay davrga to‘g‘ri kelmoqda, chunki so‘nggi iPhone-qurilmalari narxi allaqachon qimmatlashgan edi. Masalan, Germaniyada iPhone 18 Pro boshlang‘ich 256 GB talqini 1 449 yevrodan boshlanib, avvalgi avloddan 150 yevroga qimmatroq sotilmoqda. Shunga qaramay, 2027 yildagi ortiqcha xarajatlar to‘g‘ridan-to‘g‘ri oddiy xaridorlar zimmasiga yuklanishi yoki yo‘qligi hozircha noma'lum bo‘lib qolmoqda.