1 mln dollar nafaqa puli AQShda necha yilga yetadi? 💰

AQShda nafaqa yoshidagi fuqarolar uchun 1 million dollar miqdoridagi jamg'arma mamlakatning hech bir hududida 25 yil davomida yashash xarajatlarini qoplashga yetmasligi ma'lum bo'ldi. GoBankingRates o'tkazgan tahlil natijalariga ko'ra, yashash qiymati yuqori bo'lgan hududlarda yirik jamg'armalar ham juda tez tugab boradi. Masalan, Gavayi, Nyu-York va Kaliforniya shtatlarida 1 million dollar atigi 15 yil ichida batamom sarflanib ketadi. Ushbu shtatlardagi nafaqaxo'rlar yiliga taxminan 5 ming dollar yoki undan ko'proq oziq-ovqat, shuningdek, 20 ming dollardan ortiq uy-joy xarajatlariga duch kelishadi.

Charles Schwab tomonidan chop etilgan tadqiqotga ko'ra, amerikalik ishchilar o'rtacha hisobda nafaqa uchun 1,8 million dollar jamg'arish kerakligiga ishonishadi. Empower ma'lumotlariga ko'ra, 65-70 yoshdagi amerikaliklarning o'rtacha 401(k) hisobvarag'i 185 858 dollarni tashkil qiladi. Biroq, hatto 1 million dollardan ortiq mablag'ga ega bo'lganlar ham pul qancha muddatga yetishini o'ylab ko'rishlari kerak va bu borada yashash joyi muhim rol o'ynaydi.

Aksincha, ushbu mablag' G'arbiy O'rta va Janubiy shtatlarda ancha uzoqroqqa yetadi. Xususan, Kanzas, Oklahoman va Missisipi kabi shtatlarda nafaqaxo'rlar 21 yil yoki undan ortiqroq muddat davomida ushbu mablag' hisobidan yashashlari mumkin. Jumladan, oziq-ovqat va uy narxlarini o'z ichiga olgan to'qqizta omilni o'rgangan CreditDonkey hisobotiga ko'ra, Missisipi shtati nafaqaga chiqish uchun eng yaxshi 1-raqamli shtat deb topildi.

Tadqiqot natijalariga ko'ra, mablag' eng uzoq vaqtga yetadigan oltita shtat qatoriga Jorjiya, Ayova, Alabama, Kanzas, Oklahoma va Missisipi kiradi. Ushbu hududlarda uy-joy va kundalik xarajatlar boshqa shtatlarga nisbatan pastroq bo'lib, nafaqaxo'rlarga o'z jamg'armalarini 21 yildan ziyodroq muddat davomida tejab ishlatish imkonini beradi.