AI chiplovchi kompyuterlar asosi 2025-yilga toʻgʻri keladi 💻

Dunyoning yetakchi protsessor ishlab chiqaruvchilari boʻlmish AMD va Intel kompaniyalari oʻzlarining sunʼiy intellekt vazifalarini bajarishni tezlashtiruvchi yangi avlod protsessorlarini jamoatchilikka faol tanishtirmoqda. Ushbu chiplar asosida kompyuterlar tayyorlovchi Asustek Computer rahbariyati ham mazkur texnologiyalarning istiqboliga ijobiy baho berib, asosiy bozor oʻsishi 2025-yilga toʻgʻri kelishini taxmin qilmoqda.

Asustek Computer bosh direktori Samson Xuning maʼlum qilishicha, sunʼiy intellektni qoʻllab-quvvatlaydigan ilk smartfon va shaxsiy kompyuterlar bozorda 2024-yil davomida paydo boʻla boshlaydi. Biroq yil oxirigacha ularning tarqalishi va ommalashuvi nisbatan cheklangan hajmda kechadi.

Faqatgina 2025-yilga kelibgina bunday zamonaviy qurilmalarga boʻlgan talab oʻnlab foizga oʻsa boshlaydi. Mutaxassislarning fikricha, bu holat pandemiya davridagi ortiqcha ishlab chiqarish inqirozidan keyin shaxsiy kompyuterlar bozorining jonlanishiga va uning tiklanishiga xizmat qiladi.

Shu bilan birga, Intel va AMD kompaniyalari Windows 10 operatsion tizimini qoʻllab-quvvatlash davrining yakunlanishi kelgusi yildayoq foydalanuvchilarni yangi kompyuterlar sotib olishga undashiga ishonch bildirmoqda.