Ethereum blok vaqtini 10 sekundga qisqartirishi mumkin ⏱️

Ethereum ekotizimida tarmoq unumdorligini oshirish va tranzaksiya tezligini tezlashtirish borasida muhim muhokamalar davom etmoqda. Ethereum Institutional notijorat tashkiloti Ethereum tarmoq bloklari oralig'ini qisqartirishga qaratilgan tashabbusni qo'llab-quvvatlashini bildirdi. Mazkur o'zgarish ommaviy blokcheynlarda moliyaviy faoliyat hajmining oshib borayotgani va institutsional foydalanuvchilar talablari ortgani bilan izohlanmoqda.

Muhokama qilinayotgan EIP 8198 taklifi, shuningdek Quick Slots nomi bilan ham tanilgan, tarmoq bloklari oralig'ini bosqichma-bosqich qisqartirish imkonini beradi. Dastlabki rejalarga ko'ra, ishlab chiquvchilar blok vaqtini hozirgi 12 sekunddan 10 sekundga tushirishni maqsad qilgan. Kelgusida tarmoq barqarorligi va imkoniyatlari to'liq bahòlangach, bu ko'rsatkichni yanada kamaytirish ehtimoli ham ko'rib chiqiladi.

Ethlabs tadqiqot guruhi tomonidan o'tkazilgan o'rganishlar natijasida, yigirmata markazlashtirilmagan moliya asoschilari Quick Slots tashabbusini keng qo'llab-quvvatlagani ma'lum bo'ldi. Ushbu taklif shu yilning mart oyida tayyorlanib, avgust oyida bo'lib o'tgan dasturchilar yig'ilishida rasman taqdim etilgan edi. Hozirgi vaqtda mutaxassislar asosiy kod bazasini birlashtirish va texnik bog'liqliklarni o'rganish ustida ish olib bormoqda.

Mazkur yangilanish Ethereum'ning Glamsterdam yangilanishidan keyingi bosqich bo'lgan Hegotá yangilanishi doirasiga kiritilishi mumkin. Shunga qaramay, EIP 8198 hali to'liq tasdiqlanmagan bo'lib, uning yakuniy taqdiri qo'shimcha sinovlar va mijoz dasturiy ta'minoti jamoalarining kelishuviga bog'liq bo'lib qolmoqda.