🎮 "Marvel's Wolverine" ilk sotuvlari ma'lum qilindi

Sony kompaniyasi "Marvel’s Wolverine" o‘yinining rasmiy savdo ko‘rsatkichlarini hali e'lon qilmagan bo‘lsa-da, Alinea Analytics tahlilchisi Ris Elliotning ma'lumotlariga ko'ra, loyiha 15-sentabrda sotuvga chiqqanidan beri 1,9 million nusxada sotilgan. Ushbu savdolar natijasida taxminan 130 million dollar daromad olingan. Elliotning ta'kidlashicha, ushbu tushumning taxminan 22,9 foizi fizik nusxalar savdosiga to'g'ri keladi. Shuni eslatib o'tish joizki, Sony 2028-yildan boshlab PlayStation disklarini ishlab chiqarishni to'xtatishni rejalashtirgan.

Taqqoslash uchun, Sucker Punch studiyasining "Ghost of Yotei" o‘yini 32 kun ichida 3,3 million nusxada sotilgan edi. Shuningdek, Insomniac studiyasining "Spider-Man 2" o‘yini atigi 24 soat ichida 2,5 milliondan ortiq nusxada sotilib, tarixda eng tez sotilgan PlayStation Studios loyihalaridan biriga aylangandi. Olingan dastlabki ma'lumotlarga tayanilsa, "Marvel’s Wolverine" savdo ko‘rsatkichlari bo‘yicha "Spider-Man 2"dan ortda qolmoqda, biroq u "Death Stranding 2"ning PS5'dagi umumiy sotuvlari va daromadini allaqachon ortda qoldirgan.

Shuningdek, tahlilchining fikricha, bu o'yin joriy yilda PS5 uchun chiqarilgan yangi PlayStation Studios loyihalari orasida eng yaxshi natija ko'rsatganlardan biri bo'lib, "MLB The Show", "Marathon", "Saros" va "Marvel Tōkon" kabi loyihalardan oldinda bormoqda. Biroq o‘yinning Metascore reytingi 77 balni tashkil etib, IGN uni 10 baldan 6 ball bilan baholagan va uning jangovar tizimi oxiriga kelib zerikarli bo'lib qolishini qayd etgan.

Kelgusidagi savdolar prognoziga kelsak, dekabr oyida "Avengers: Doomsday" filmining chiqarilishi, shuningdek, noyabr oyida "GTA 6" relisi sababli PS5 foydalanuvchilari bazasining kengayishi o'yin savdolariga ijobiy ta'sir ko'rsatishi kutilmoqda. Mutaxassislar "Wolverine" barqaror sotilishini, biroq "Spider-Man" darajasidagi ulkan muvaffaqiyatga erishmasligini taxmin qilishmoqda.