Yangi firibgarlik: uyda sovun qadoqlash 🧼

Rossiyada masofaviy ish qidirayotgan fuqarolarni aldashga qaratilgan navbatdagi firibgarlik sxemasi fosh etildi. Bu haqda TASS axborot agentligi "Xalq fronti"ning "Moshelovka" platformasi kuratori Alla Xrapunovaga tayanib xabar berdi. Mutaxassisning so‘zlariga ko‘ra, firibgarlar sovg‘alar va esdalik buyumlari savdosi bilan shug‘ullanuvchi ulgurji kompaniya niqobi ostida ish ko‘rmoqda. Ular fuqarolarga suvenir sovunni qadoqlash bo‘yicha masofaviy ishni taklif qilmoqda.

Soxta e'lonlarda oyiga 70 ming rublgacha maosh to‘lanishi va'da qilinadi. Nomzod pochta orqali keladigan mahsulotni qabul qilib, uni qadoqlashi hamda omborga qaytadan jo‘natishi kerakligi tushuntiriladi. Firibgarlar rasmiy bandlik va uzoq muddatli barqaror ish o‘rinlarini va'da qilib, barcha logistika pochta xizmati orqali amalga oshishini bildirishadi.

Vakansiyaga qiziqqan shaxslar Telegram orqali muloqotga kirishishga undaladi. Soxta xodimlar shartlarni tushuntirib, turli fotosurat va videolarni taqdim etgan holda taklifni juda jozibali qilib ko‘rsatishadi. Biroq asosiy shart sifatida ish boshlanishidan oldin tovar uchun 2-3 ming rubl miqdorida garov puli kiritish talab etiladi. Bu pul niyatlarning jiddiyligini tasdiqlash uchun kerakligi aytiladi.

Jinoyatchilar bu mablag‘ pochta orqali posilka olingandan keyin to‘liq qaytarilishiga ishontirishadi. Pulni o‘tkazish uchun Tezkor to‘lovlar tizimidan foydalanilib, to‘lov raqami Telegram orqali beriladi. Oldindan to‘lov zarurati tovarlarni pochtaga yetkazib beruvchi kuryerlik xizmati uchun pul kerakligi bilan izohlanadi.

Pul o‘tkazilgach, qurbonga ariza yaratilgani va kuryer buyurtma qilingani haqida xabar keladi. Shundan so‘ng jinoyatchilar xatolik yuz berganini va qaytarib yuborish narxini hisobga olgan holda summani ikki baravar oshirish kerakligini aytishadi. Agar jabrlanuvchi qo‘shimcha to‘lov qilishdan bosh tortsa, ular darhol aloqani uzib, akkauntlarini o‘chirib yuborishadi. Ekspertning ta'kidlashicha, ushbu aldovning muvaffaqiyati e'lonlarning qulay tilda tuzilgani hamda barqarorlik va kafolatlar va'da qilinishi bilan bog‘liq.