Toncoin kursi 27 foizga oshdi 📈

Telegram asoschisi Pavel Durovning kompaniya The Open Network (TON) tarmog'ida yetakchi rol o'znasini e'lon qilishi ortidan Toncoin (TON) kriptovalyutasi narxi sezilarli darajada ko'tarildi. Olingan ma'lumotlarga ko'ra, mazkur tanga qiymati bir sutka ichida 27 foizga, oxirgi hafta davomida esa naq 40 foizga qimmatlashgan.

Pavel Durov o'zining shaxsiy Telegram kanali orqali bayonot berib, uning kompaniyasi TON tarmog'ini rivojlantirishda asosiy harakatlantiruvchi kuch bo'lgan TON Foundation o'rnini egallashini ma'lum qildi. Uning ta'kidlashicha, Telegram tarmoqdagi eng yirik validatorga aylanadi. Ma'lumot uchun, validator – bu blokcheyndagi tranzaktsiyalarni tasdiqlovchi va buning evaziga mukofot oluvchi ishtirokchi hisoblanadi. Mazkur qadam tufayli Telegram nafaqat muhim texnik vazifani bajaradi, balki tarmoq protokolidagi qarorlarga sezilarli darajada ta'sir o'tkazish imkoniyatiga ham ega bo'ladi.

Strategik o'zgarishlar bilan bir qatorda, texnik yaxshilanishlarga ham alohida e'tibor qaratilmoqda. Durovning bildirishicha, TON tarmog'idagi tranzaksiya xarajatlari olti baravar qisqartirilib, deyarli nol ko'rsatkichiga keltirilgan. Shuningdek, yangi veb-sayt, dasturchilar uchun maxsus vositalar va ishlash unumdorligini oshiruvchi keng qamrovli yangilanishlar ishga tushirilishi aytildi. TON Foundation'dan Telegram'ga to'liq o'tish jarayoni kelgusi ikki-uch hafta mobaynida yakunlanishi kutilmoqda.

Ushbu o'zgarish Toncoin'ni Telegram biznes modeliga yanada chuqurroq integratsiya qilmoqda. Xabaringiz bor, messenjerning reklama platformasida reklama maydonchalarini sotib olish uchun allaqachon Toncoin'dan to'lov vositasi sifatida foydalanilmoqda. Telegram kanal egalari esa reklama tushumlarining 50 foizini aynan Toncoin ko'rinishida oladilar.

Shu tariqa, dunyo bo'ylab yuz millionlab foydalanuvchilarga ega bo'lgan mazkur xizmat doirasida kriptovalyutaning o'rni tobora mustahkamlanib bormoqda. E'lon qilingan yangiliklar fonida yuz bergan keskin o'sish natijasida Toncoin'ning narxi taqdim etilgan vaqtda 1,78 AQSh dollarini tashkil etdi.