Honor Magic6 flagmanining tashqi ko‘rinishi oshkor etildi 📱

Honor kompaniyasining bosh direktori Jorj Chjao internetda bo‘lajak flagman smartfon – Magic6 modelining tashqi ko‘rinishini fosh etuvchi rasmiy tasvirni e’lon qildi. Uning so‘zlariga ko‘ra, qurilma dizayni tabiat va tarixiy motivlar uyg‘unligidan ilhomlangan holda yaratilgan. Smartfonning orqa qismida yumshoq chiziqlar bilan o‘ralgan uchta kamera joylashgan bo‘lib, paneldagi naqshlar Sinsin ko‘lining suv yuzasini eslatib yuboradi. Shuningdek, kameraning shakli Xitoy tarixiga borib taqdigan va vazifasi sir saqlanadigan nefrit kong artefaktiga qiyoslanmoqda.

Kompaniya rahbari ichki tuzilma ham soddalik tamoyiliga asoslanib, "Star Wheel Triple Camera" o‘ziga xos sxemasini saqlab qolganini ta’kidladi. Chjao Sinsin ko‘lining qishki manzarasini aks ettiruvchi Haihu Qing nomli yangi rang variantini ham taqdim etdi va bu foydalanuvchilarni lol qoldirishini va’da qildi.

Taniqli insayder Digital Chat Station esa Pro versiyaning suratini bo‘lishib, undagi xotira modifikatsiyalari 256 gigabaytdan 1 terabaytgacha bo‘lishini ma’lum qildi. Ushbu versiya qora, oq, yashil, moviy va binafsharang tuslarda sotuvga chiqishi kutilmoqda. Shuningdek, mutaxassislar Pro modelining yupqa hoshiyalarga ega egilgan ekranini va old kameralar uchun cho‘zilgan tirqishini payqashgan.

Tarqalgan ma’lumotlarga ko‘ra, Magic6 Pro modeli dyuymli datchikka ega 50 megapikselli asosiy kamera, Samsung HP3 modulli 200 megapikselli telefoto kamera va 50 megapikselli keng burchakli obyektif bilan ta’minlanadi. Oddiy versiyada esa barcha uchta kamera 50 megapikselli bo‘lishi kutilmoqda. Ikkala smartfonning dastlabki taqdimoti 10-11-yanvar kunlariga mo‘ljallangan.