Honor Magic6 flagmanining tashqi ko‘rinishi oshkor etildi 📱

Honor kompaniyasi bosh direktori Jorj Chjao ijtimoiy tarmoqlarda bo‘lajak flagman smartfon – Magic6 tashqi ko‘rinishini fosh etuvchi rasmni e'lon qildi. Uning so‘zlariga ko‘ra, qurilma dizayni tabiat va qadimiy tarixiy elementlardan ilhomlangan holda yaratilgan bo‘lib, orqa qopqoqdagi tasvir Tsinxay ko‘rining suv yuzasini aks ettiradi. Shuningdek, kamera blokining shakli Xitoy tarixiga oid, vazifasi sir saqlanayotgan nefrit kong artefaktini eslatishi ta'kidlandi.

Kompaniya rahbari smartfonning ichki tuzilishi ham soddalik tamoyiliga asoslanishini va "Star Wheel Triple Camera" nomli o‘ziga xos kameraga egaligini qo‘shimcha qildi. Chjao taqdim etgan Haihu Qing deb nomlangan yangi rang Tsinxay ko‘rining qishki manzarasini gavdalantirib, foydalanuvchilarni lol qoldirishi va'da qilinmoqda.

Mashhur Digital Chat Station insayeri esa Magic6 Pro versiyasining suratini ulashib, uning xotira modifikatsiyalari 256 GB, 512 GB hamda 1 TB bo‘lishini bildirdi. Shuningdek, qora, oq, yashil, moviy va binafsha ranglar taqdim etilishi, old panelda esa egilgan ekran, cho‘zik teshik va yupqa hoshiyalar bo‘lishi ma'lum qilindi.

Tarqalgan ma'lumotlarga ko‘ra, Pro versiya bir dyuymli sensorli 50 Mp asosiy kamera, 200 Mp Samsung HP3 teleobyektiv hamda 50 Mp keng burchakli obyektiv bilan jihozlanadi. Odatiy modelda esa uchala kamera ham 50 megapikselli bo‘lishi kutilmoqda. Mazkur yangi flagmanlarning dastlabki taqdimoti 10-11 yanvar kunlariga belgilangan.