KXDR xakerlari 7 mingdan ortiq hamyonni o'g'irladi 🚨

Yaponiyaning Milliy politsiya agentligi xalqaro hamkorlar bilan birgalikda Shimoliy Koreya bilan aloqador WaterPlum xakerlar guruhining kiberjinoyatlarini fosh etdi. O'tkazilgan qo'shma tekshiruvlar natijasida mazkur guruh dunyo bo'ylab yuzdan ortiq mamlakat va hududlarda 30 mingdan ortiq kompyuter va qurilmalarni zararlagani aniqlandi.

Mutaxassislarning ma'lumotlariga ko'ra, hujumlar natijasida 7 mingdan ziyod kriptovalyuta hamyoniga oid ma'lumotlar o'g'irlangan. Shuningdek, xakerlar nazoratidagi hamyonlarga kamida 1,7 milliard yen yoki yapon rasmiylari hisob-kitobiga ko'ra taxminan 10,7 million dollar miqdoridagi mablag' kelib tushgani ma'lum bo'ldi.

Yaponiya va AQSh idoralari olib borgan surishtiruvlar WaterPlum guruhi va ayrim Shimoliy Koreya IT xodimlari Koreya Mehnat partiyasining Byuro 313 tashkiloti ostida faoliyat yuritishini ko'rsatdi. Tekshiruvlar davomida mamlakat ichida soxta masofaviy ish joylarini yashirin ravishda boshqarib kelgan noutbuklar farmasi ham tugatildi.

Jinoyatchilar dasturchilar, veb-dizaynerlar hamda kriptovalyuta, blokcheyn va sun'iy intellekt yo'nalishida ishlovchi mutaxassislarni nishonga olgan. Ular ijtimoiy tarmoqlar va frilanser platformalari orqali o'zlarini nufuzli kompaniya sifatida tanishtirib, dasturlash sinovlari va texnik suhbatlar niqobi ostida zararli dasturlarni tarqatgan.