🍎 Apple taqdimotida nima yangiliklar bo'ladi?

Yaqinlashib kelayotgan "Spring Loaded" anjumani oldidan bir nechta manbalar kelgusi taqdimotda nimalar namoyish etilishi haqida o'z ma'lumotlarini ulashdi. Mazkur jonli efirga uzatiladigan tadbir Germaniya vaqti bilan 20-aprel seshanba kuni soat 19:00 da boshlanishi rejalashtirilgan. Xitoyning Weibo tarmog'idagi Uncle Pan laqabli fosh qiluvchi Apple kompaniyasi yangi rusumdagi stilusni taqdim etishini ma'lum qildi. Hozircha bu qurilmaning aniq o'zgarishlari sir saqlanmoqda, biroq uchinchi avlod Apple Pencil maxsus yangi iPad Pro uchun moslashtirilib, yuqori sezgirlik va kamroq kechikishni ta'minlashi mumkinligi taxmin qilinmoqda.

Shuningdek, Twitter tarmog'idagi @LeaksApplePro ham uchinchi avlod Apple Pencil qalamchasi ushbu tadbirda yuzaga chiqishini tasdiqlagan. Uning so'zlariga ko'ra, yangi qalamchadan tashqari iPad Pro, yangi Magic Keyboard klaviaturasi, qo'shimcha g'iloflar va Apple Watch aqlli soati uchun lentalar ham namoyish qilinadi. Shu bilan birga, iMac kompyuterlari va AirTags qurilmalari bu safar ko'rsatilmaydi, ularning taqdimoti kelgusida, jumladan WWDC tadbiriga qoldirilishi kutilmoqda.

Bloomberg nashri muxbiri Mark Gurman ham video orqali shunga o'xshash ma'lumotlarni berib o'tdi va ushbu anjumandan o'ta inqilobiy mahsulotlarni kutish kerak emasligini eslatdi. Biroq, uning so'zlariga ko'ra, tadbirning asosiy yulduzi yangi avlod iPad Pro plansheti bo'ladi. Ushbu qurilma Apple M1 protsessoriga teng keladigan ancha tezkor chip, Thunderbolt porti hamda 12,9 dyuymli modelda yuqori yorqinlik va mukammal kontrastni ta'minlovchi Mini-LED ekran bilan jihozlanishi kutilmoqda. Shuningdek, tarqatilgan videoda AirTags qurilmalarining ham mazkur tadbirda chiqarilishi rejalashtirilgani aytib o'tilgan.