⚡️ Ethereum tarmogida slot davomiyligini qisqartirish qo‘llab-quvvatlandi

18-sentabr kuni Ethereum Institutional notijorat tashkiloti Ethlabs tomonidan ilgari surilayotgan EIP-8198 Quick Slots taklifini rasman qo‘llab-quvvatladi. Ushbu tashabbus Ethereum tarmog‘ini yanada tezkor qilish va institutsional faollikning onchain muhitga o‘tishini rag‘batlantirishga qaratilgan bo‘lib, moliyaviy bozorlar uchun mustahkam poydevor yaratishi ta'kidlandi.

EIP-8198 taklifining asosiy mohiyati mijoz dasturiy ta'minotidagi qat'iy belgilangan 12 soniyali slot davomiyligini olib tashlash va uni moslashuvchan parametrga aylantirishdan iborat. Shundan so'ng dasturchilar kelgusidagi yangilanishlar davomida bu vaqtni bosqichma-bosqich qisqartirib borish imkoniyatiga ega bo'ladilar. Dastlabki sinovlar va unumdorlikni baholash jarayonidan kelib chiqib, Ethlabs dastlabki bosqichda vaqtni 10 soniyaga tushirishni taklif qilmoqda.

Slot vaqtining qisqarishi tranzaksiyalarni tasdiqlash va onchain bozorlardagi narxlarni yangilash tezligini oshiradi, shuningdek, to'lovlar hamda ilovalar uchun kechikishlarni kamaytiradi. Biroq bu o'zgarish nafaqat bitta parametrga, balki konsensus mijozlari va boshqa infratuzilma qismlariga ham ta'sir ko'rsatadi. Taklif mualliflari gaz limitlari va BLOB obyektlari parametrlarini mutanosib ravishda o'zgartirishni, shuningdek, validatorlarning hisoblash resurslariga bo'lgan talablari oshishi mumkinligini qayd etishdi.

Joriy yilning 6-avgustida Ethlabs ushbu taklifni Hegota yangilanishi uchun ko'rib chiqishni rasman so'ragan edi. 7-sentabr kuni esa Ethereum Foundation Protocol Cluster uni B darajasidagi takliflar qatoriga kiritdi. Ethereum Foundation muhandislari Quick slots ustuvorligini oshirish uchun to'laqonli spetsifikatsiya, ishlaydigan prototip, ekotizimga ta'sirni batafsil baholash va kelajakdagi arxitekturaga mosligini tasdiqlash kabi to'rtta shartni bajarish lozimligini belgilashdi.