AQShda bitkoin-rezerv qonun loyihasi ma'qullandi 🇺🇸

AQSh Vakillar palatasining Moliya xizmatlari qo'mitasi federal miqyosda strategik bitkoin-rezerni rasmiylashtirishni nazarda tutuvchi qonun loyihasini ma'qulladi. Mazkur tashabbus uchun 28 nafar deputat ovoz bergan bo'lsa, qarshi tomon 21 ovozni tashkil etdi. Ushbu hujjat may oyida respublikachi Nik Begich va demokrat Jared Golden tomonidan taqdim etilgan American Reserve Modernization Act qonuniga asoslanadi.

Ovoz berish jarayoni boshlanishidan avval qo'mita respublikachi Brayan Steyl tomonidan tayyorlangan yangilangan tahrirni qabul qildi. Endilikda ushbu qonun loyihasi butun Vakillar palatasining muhokamasiga va ovoz berishiga kiritilishi mumkin. Shundan so'ng u Senatdan o'tib, prezident imzosini olishi talab etiladi.

Qabul qilingan loyihaga ko'ra, Moliya vazirligi 180 kun ichida strategik bitkoin-rezervi va boshqa raqamli aktivlar uchun alohida ombor tashkil etishi shart. Barcha federal idoralar o'z nazoratidagi kriptovalyutalarni xatlovdan o'tkazishi kerak bo'ladi. Davlatga qarashli va boshqa maqsadlarga mo'ljallanmagan bitkoinlar, jumladan musodara qilingan tangalar ushbu rezervga yo'naltiriladi. Qolgan raqamli aktivlar esa alohida zaxiraga o'tkazilib, ulardan tushgan mablag'lar davlat qarzini qisqartirishga sarflanishi mumkin.

Rezervga kiritilgan bitkoinlarni qonun qabul qilingandan keyin 20 yil mobaynida sotish, almashtirish yoki garovga qo'yish qat'iyan taqiqlanadi. Muddat tugashidan ikki yil oldin Moliya vazirligi Kongressga tangalarning kelgusi taqdiri bo'yicha tavsiyalar taqdim etishi lozim. Shuningdek, hujjatda mustaqil audit, Hisob palatasi nazorati va har yilgi kriptografik hisobotlarni taqdim etish ko'zda tutilgan. Hukumat qo'shimcha soliqlar yoki qarz olmasdan turib rezervni to'ldirish yo'llarini o'rganib chiqadi.