Samsung va AMD sun'iy intellekt xotirasi bo'yicha hamkorlikni kengaytirmoqda 🤝

Samsung Electronics va AMD kompaniyalari suniy intellekt xotirasi va hisoblash texnologiyalari sohasidagi strategik hamkorligini yanada kengaytirish bo'yicha muhim kelishuvga erishdilar. Janubiy Koreyadagi Pyeongtaek ishlab chiqarish majmuasida o'tkazilgan rasmiy marosimda ikki kompaniya rahbarlari o'zaro anglashuv memorandumini imzoladilar. Ushbu tadbirda AMD bosh direktori Liza Su va Samsung Electronics bosh direktori Yon Xyun Jun ishtirok etdi.

Tomonlar suniy intellekt infratuzilmasini rivojlantirish yo'lida kuchlarni birlashtirishga kelishib olishdi. Samsung rahbariyatining ta'kidlashicha, kompaniya HBM4 xotiralari, ilg'or qoliplash va ilg'or yarimo'tkazgichlar ishlab chiqarish imkoniyatlari orqali AMDning suniy intellekt bo'yicha rejalarini qo'llab-quvvatlashga tayyor. O'z navbatida, AMD rahbari ham ushbu hamkorlik kremniydan tortib to to'liq tokchali platformalargacha bo'lgan butun tizimni qamrab olishini va zamonaviy texnologiyalarni yaratishda muhim ahamiyat kasb etishini qayd etdi.

Imzolangan memorandumga muvofiq, kompaniyalar kelgusi avlod AMD Instinct MI455X grafik protsessorlari uchun asosiy HBM4 xotirasi ta'minoti hamda Venice kod nomiga ega oltinchi avlod AMD EPYC protsessorlari uchun ilg'or DRAM yechimlari ustida hamkorlik qiladi. Bu texnologiyalar AMDning Helios kabi zamonaviy tokchali arxitekturalarini quvvatlashga mo'ljallangan bo'lib, suniy intellekt tizimlarining samaradorligini oshiradi.

Bugungi kunda ma'lumotlar markazlari va suniy intellekt vazifalari uchun xotira tezligi hamda energiya tejamkorligi hal qiluvchi ahamiyat kasb etmoqda. Samsung kompaniyasining ommaviy ishlab chiqarishga kiritilgan HBM4 xotirasi 10 nanometrli oltinchi avlod DRAM jarayoni va 4 nanometrli mantiqiy asosga tayanadi. U soniyasiga 13 gigabitgacha tezlikni va standartlardan yuqori bo'lgan 3.3 terabaytgacha o'tkazish qobiliyatini ta'minlaydi.

Ushbu ilg'or ko'rsatkichlarga ega Samsung HBM4 xotirasi bilan jihozlangan AMD Instinct MI455X GPU modellari suniy intellekt modellarini o'qitish va tahlil qilish jarayonlari uchun eng maqbul yechim bo'lishi kutilmoqda. Shuningdek, kompaniyalar oltinchi avlod EPYC protsessorlari uchun maxsus optimallashtirilgan yuqori unumdorlikdagi DDR5 xotira yechimlarini yetkazib berish ustida ham birgalikda ish olib bormoqda.