AQShda bitkoin xarid qilish qonuni ma'qullandi 🇺🇸

AQSh Vakillar palatasida davlat mablag'lari hisobidan raqamli aktivlarni xarid qilishni huquqiy jihatdan tartibga soluvchi yangi qonun loyihasi ma'qullandi. Ushbu hujjat Moliya vazirligiga davlat byudjeti hisobidan kriptovalyuta sotib olish huquqini beradi, biroq bu jarayon davlat qarzi oshishiga yo'l qo'ymasligi lozim. Qonun loyihasining shartlariga ko'ra, kriptorezerni to'ldirish uchun kredit mablag'lari, soliq tushumlari yoki byudjet taqchilligidan foydalanish qat'iyan taqiqlanadi. Mazkur tashabbus Kongressning 23 nafar vakili, jumladan 22 nafar respublikachi va 1 nafar demokrat tomonidan taqdim etilgan.

Hujjatning avvalgi versiyasida har bir yangi xarid qilingan bitkoin partiyasi uchun alohida yigirma yillik bloklash muddati ko'zda tutilgan edi. Biroq ma'qullangan so'nggi tahrirda bu tartib o'zgartirildi. Unga ko'ra, yigirma yillik cheklov muddati har bir alohida xarid vaqtidan qat'i nazar, qonun kuchga kirgan sanadan boshlab hisoblanadi. Bundan tashqari, iqtisodiy inqiroz yuzaga kelgan taqdirda, g'aznachilikka har ikki yilda bir marta zaxiradagi bitkoinlarning 10 foizgacha bo'lgan qismini sotish huquqi beriladi.

Muqobil tokenlar va altkoinlar uchun esa bloklash muddati ancha qisqaroq qilib belgilandi. Dastlab mualliflar bu muddatni besh yil etib belgilamoqchi bo'lgan bo'lsa-da, yakunda uni bir yilgacha qisqartirishdi. Ushbu muddat o'tgach, g'aznachilik tokenlarni sotish va tushgan mablag'ni davlat byudjetiga yo'naltirish huquqiga ega bo'ladi.

Eslatib o'tamiz, o'tgan yilning mart oyida AQSh Prezidenti Donald Tramp davlat kriptorezervini yaratish bo'yicha farmon imzolagan edi. Ushbu hujjat amaldorlarga jinoyat ishlari doirasida musodara qilingan bitkoinlarni saqlashni tavsiya qilgan. Biroq mazkur farmon faqat Oq uyga bo'ysunuvchi tuzilmalarga taalluqli bo'lib, tavsiyaviy xususiyatga ega bo'lgani sababli, to'laqonli zaxira yaratish uchun maxsus qonun zarur edi. Qonun loyihasi mualliflarining taxminlariga ko'ra, davlat idoralari tasarrufida 198 mingdan 328 ming 372 tagacha bitkoin mavjud, garchi g'aznachilik musodara qilingan manzillarning umumiy balansini ochiqlamasa ham. Shu bilan birga, Tramp va uning tarafdorlari ilgari surgan CLARITY kriptovalyuta qonuni Senatdan o'ta olmaganini ham ta'kidlash joiz, chunki u yetarlicha ovoz to'play olmagan.