HELLDIVERS 2 Steam’da rekor qirdi! 🎮

Sony kompaniyasi so'nggi ikki yildan buyon o'zining mashhur PlayStation loyihalarini kompyuter foydalanuvchilariga ham taqdim etib kelmoqda. Bu davr mobaynida God of War va Spider-Man kabi taniqli asarlar Steam platformasi orqali PC ishqibozlariga yetkazildi. Shu tariqa kompaniya o'yin olami faqat konsollar bilan cheklanib qolmasligini ko'rsatdi.

Biroq ko'pchilik kutmagan holda, Sony'ning Steam'dagi eng ko'p bir vaqtning o'zida o'ynalgan o'yinlar rekordi kutilmagan loyiha qo'liga o'tdi. Keng omma oldida unchalik tanish bo'lmagan HELLDIVERS 2 o'yini shu paytgacha birinchilikni egallab turgan God of War'dan bu unvonni tortib oldi.

Cunki atigi uch kun oldin Steam tarmog'ida sotuvga chiqqan mazkur yangi mahsulot bir vaqtning o'zida 155 mingdan ziyod foydalanuvchini jamlay oldi. Taqqoslash uchun, ikkinchi o'ringa tushib qolgan God of War eng ko'pi bilan 78 mingga yaqin onlayn o'yinchiga ega bo'lgan edi.

Uchinchi pog'onani esa 66 mingdan ortiq ko'rsatkich bilan Marvel's Spider-man Remastered egallab turibdi. Shuningdek, reytingning keyingi o'rinlaridan Horizon Zero Dawn, The Last of Us Part I, Days Gone va Uncharted kabi boshqa mashhur port qilingan loyihalar ham joy olgan.