Timur Kapadze Osiyo kubogi saralashi haqida gapirdi ⚽️

Joriy yilning 27-oktabridan 2-noyabriga qadar mamlakatimizda U-23 Osiyo kubogi saralash bosqichining "D" guruhi o‘yinlari tashkil etiladi. Shu munosabat bilan bugun "Paxtakor" stadioni anjumanlar zalida musobaqa oldidan rasmiy matbuot anjumani o‘tkazildi. Unda O‘zbekiston yoshlar terma jamoasi bosh murabbiyi Timur Kapadze ishtirok etib, bo‘lajak bahslar haqida o‘z fikrlarini bildirib o‘tdi.

Murabbiyning ta’kidlashicha, ushbu saralash bosqichi jamoa uchun muhim tayyorgarlik vazifasini o‘taydi. Bahslarning O‘zbekistonda o‘tkazilishi esa jamoaga qo‘shimcha qulaylik yaratadi. Kapadzening fikricha, oldinda turgan o‘yinlar futbolchilarga xalqaro tajriba taqdim etadi va terma jamoaning hozirgi holati hamda darajasini aniqlab olishga xizmat qiladi.

Anjumanda "Nasaf" klubining finalga chiqqani yoshlar jamoasiga ta’sir qilmagani alohida qayd etildi. Garchi Husayn Norchayev ushbu yig‘inga jalb qilinmagan bo‘lsa-da, bu holat boshqa futbolchilarga o‘zlarini namoyon etish uchun yaxshi imkoniyat berishi aytildi. Umuman olganda, bunday musobaqalar barcha ishtirokchilar uchun foydali tajriba maktabi bo‘lishi ta’kidlandi.

Yosh jamoa bilan musobaqada qatnashish katta muammo tug‘dirmasligi, chunki murabbiylar shtabi oldiga jiddiy maqsadlar qo‘yilgani va ular sari to‘g‘ri harakat qilinayotgani ma’lum qilindi. Terma jamoada tanlov imkoniyati keng va iqtidorli yoshlar ko‘pligi, yig‘inga jalb etilgan 23 nafar futbolchi belgilangan uchta o‘yinda bor kuchini ko‘rsatishiga ishonch bildirildi. Tadbir yakunida bosh murabbiy barcha raqib jamoalarga omad tiladi.

Eslatib o‘tamiz, "D" guruhidan O‘zbekiston bilan birgalikda Saudiya Arabistoni va Bangladesh terma jamoalari ham o‘rin olgan.