Yangi Konstitutsiyaning asosiy mezonlari 📜

Prezident Shavkat Mirziyoyev Konstitutsiya bayrami munosabati bilan yo‘llagan tabrigida 2022 yilda mamlakatimizda yangi qomus qabul qilinishini ma'lum qilgan edi. Mazkur hujjatda jamiyat va davlat taraqqiyotini belgilab beruvchi bir qator asosiy mezonlar o‘z aksini topishi ko‘zda tutilgan.

Xususan, ilgari amalda bo‘lgan "davlat – jamiyat – inson" tamoyili endilikda "inson – jamiyat – davlat" degan ustuvor g‘oya asosida o‘zgartiriladi. Shuningdek, barcha iqtisodiy islohotlar jarayonida fuqarolarning manfaatlarini to‘liq ta'minlash eng asosiy mezon bo‘lishi belgilab qo‘yilmoqda.

Shu bilan birga, "Jamiyat – islohotlar tashabbuskori" g‘oyasi doirasida fuqarolik jamiyati institutlarining jamiyatdagi maqomi va o‘rni mustahkamlanadi. Oila institutini qo‘llab-quvvatlash, azaliy qadriyatlarni avlodlarga yetkazish hamda millatlararo totuvlikni asrash ham yangi qomusning asosiy yo‘nalishlaridan biridir.

Yoshlar masalasiga ham alohida e'tibor qaratilib, ularning huquq va manfaatlari, davlat siyosati va har tomonlama ko‘maklashish masalalari konstitutsiyaviy darajada belgilanadi. Shu bilan bir qatorda, "Yangi O‘zbekiston – ijtimoiy davlat" tamoyili ham qonuniy qoida sifatida muhrlanishi ko‘zda tutilgan.

Inson huquqlarini himoya qilish mexanizmlarini takomillashtirish maqsadida bolalar mehnatiga qat'iy yo‘l qo‘ymaslik, keksa avlod vakillari hamda nogironligi bo‘lgan shaxslarning huquqlarini ishonchli himoya qilish masalalari ham kiritilmoqda. Global ekologik o‘zgarishlar fonida tabiatni muhofaza qilishga oid maxsus boblar ham qo‘shilmoqda.

Nihoyat, Uchinchi Renessans poydevori bo‘lgan bog‘cha, maktab, oliy ta'lim va ilm-fan sohalarini rivojlantirish masalalari ham yangi konstitutsiyaviy qoidalarda mustahkamlanishi belgilandi.