Tonal krem surtishdagi 4 ta xato 💄

Yuz terisi mukammal va silliq ko‘rinishi uchun shunchaki tonal krem surtishning o‘zi kifoya qilmaydi. Kosmetikadan foydalanish qoidalariga rioya qilmaslik ko‘pincha kutilgan natijani bermasligi va aksincha, kamchiliklarni yanada bo‘rttirib ko‘rsatishi mumkin. Mashhur nashr hisoblangan Harper’s Bazaar tonal krem surtish jarayonida ko‘pchilik yo‘l qo‘yadigan to‘rtta asosiy xatoni ma’lum qildi.

Birinchi va eng keng tarqalgan xato bu tonal krem rangini noto‘g‘ri tanlashdir. Terining turli qismlarida rang turlicha bo‘lishi mumkinligi bois, uni bilakka surtib ko‘rish tavsiya etilmaydi. Buning o‘rniga mahsulotni yanoqlarga sinab ko‘rish, rangi bo‘yin va yelka terisidan farq qilmasligiga e’tibor qaratish lozim. Shuningdek, havo ta’sirida krem biroz oksidlanishi mumkinligini inobatga olib, uni tabiiy yorug‘lik tushadigan joyda tanlagan ma’qul.

Ikkinchi xato terini tonal kremga tayyorlamaslikdir. Sifati qanday bo‘lishidan qat’i nazar, yaxshi namlanmagan yuzda krem o‘rnini topmaydi va barcha ajinlar hamda muammolar ko‘zga tashlanib qoladi. Shu sababli surtishdan oldin terini tozalab, krem bilan namlantirish zarur, biroq yopishib qolishi ehtimoli tufayli gelli vositalarni asos sifatida ishlatish tavsiya etilmaydi.

Uchinchi xato esa cho‘tkalarga yetarlicha e’tibor bermaslik bilan bog‘liq. Vizajistlar kremni qo‘lda emas, sintetik tolali maxsus cho‘tkalarda surtishni maslahat berishadi. Ularni toza tutish muhim, chunki to‘planib qolgan bakteriyalar yuzdagi muammolarni ko‘paytirishi mumkin, shuning uchun har foydalanishdan keyin ularni yuvib quritish shart.

To‘rtinchi xato — haddan ortiq ko‘p tonal krem ishlatishdir. Ko‘p miqdordagi krem hech qachon tabiiy ko‘rinish bermaydi, aksincha, yuzni niqob taqib olgandek ko‘rsatib qo‘yadi. Mutaxassislar kremni oz miqdorda surtib, markazdan atrofga yengil harakatlar bilan tarqatishni, yaqqol muammolarni esa konsiler yordamida yashirishni tavsiya qiladilar.