AMD sun'iy intellekt stansiyasini namoyish etdi 🖥

IFA 2026 ko‘rgazmasida AMD kompaniyasi tomonidan taqdim etilgan Threadripper Halo Station deb nomlangan yuqori unumdorlikdagi ish stansiyasi 1 trilliondan ortiq parametrga ega sun'iy intellekt modellarini bevosita mahalliy qurilmada bajarishga mo‘ljallangan. Ushbu tizim ixcham stol usti mashinasida ma'lumotlar markaziga xos hisoblash quvvatini taqdim etishni maqsad qilgan.

Bulutli serverlar o‘rniga shaxsiy ish stansiyasidan foydalanish orqali AMD tadqiqotchilar va dastuchilar duch keladigan asosiy muammolardan birini hal etmoqda. Gap og‘irroq sun'iy intellekt modellari uchun bulutdagi ma'lumot almashish va hisoblash xarajatlari yildan-yilga oshib borayotganida, shuningdek, maxfiy ma'lumotlarni o‘z ichida saqlash zaruratida.

Yangi ish stansiyasining markazida Zen 5 arxitekturasiga asoslangan, 96 ta yadro va 192 ta oqimga ega Ryzen Threadripper PRO 9995WX protsessori joylashgan. Ushbu protsessor keng ko‘lamli sun'iy intellekt modellarini ishlab chiqish hamda katta hajmdagi ma'lumotlarni qayta ishlash uchun 2 terabaytgacha DDR5 xotirasi bilan ta'minlanishi mumkin.

Tizim shuningdek, o‘tgan may oyida e'lon qilingan va PCI Express 5.0 ni qo‘llab-quvvatlaydigan Instinct MI350P grafik tezlatkichlari bilan jihozlanadi. Har bir bunday tezlatkich 144 Gb HBM3E xotiraga va sekundiga 4 terabaytgacha o‘tkazish qobiliyatiga ega. Asosiy konfiguratsiyada ikkita shunday tezlatkich mavjud bo‘lib, ularni to‘rttagacha kengaytirish imkoni bor, natijada umumiy xotira 2,6 terabaytgacha, o‘tkazish qobiliyati esa 16,4 TB/s gacha yetadi.

Bunday ulkan quvvat o‘z navbatida yuqori energiya sarfini talab qiladi, chunki protsessor 350 vatt, har bir tezlatkich esa 600 vatt quvvat iste'mol qiladi. Umumiy quvvat sarfi taxminan 1550 vattni tashkil etgani bois, AMD havo o‘rniga to‘liq suyuq sovutish tizimini tanlagan. Bu esa tizimning haddan tashqari qizib ketishining oldini oladi va shovqinni kamaytiradi.

AMD ushbu qurilmani bulutli infratuzilmaga bog‘lanib qolishni istamaydigan mutaxassislar uchun mo‘ljallangan "sun'iy intellekt superkompyuteri" sifatida taqdim etmoqda. Threadripper Halo Station asosiy kompyuter ishlab chiqaruvchilari orqali 2027 yildan boshlab sotuvga chiqarilishi rejalashtirilgan.