Olimpiadachi sportchilar qanday qo'shiqlarni tinglaydi? 🎧

Parijda boshlanadigan musobaqalarda ishtirok etayotgan dunyoning eng taniqli sportchilari va paralimpiyachilar o'zlarining eng sevimli musiqiy kompozitsiyalarini oshkor qilishdi. Associated Press nashri tuzgan maxsus pleylistikada turli janr va davrlarga mansub taronalar o'rin olgan bo'lib, ular atletlarga hal qiluvchi bellashuvlar oldidan ruhlanishda yordam beradi.

AQShlik yengil atletikachi Rai Benjamin musobaqa oldidan Drake va G Herbo ijodidan tashqari, "Interstellar" kabi filmlar saundtreklarini ham tinglaydi. Uning so'zlariga ko'ra, bunday musiqalar uning e'tiborini jamlashga va hayajonni to'g'ri o'zaniga solishga xizmat qiladi. 26 yoshli sportchi tomoshabinlar energiyasidan so'ng o'zini to'g'ri holatga keltirish uchun tez va sokin ohanglar orasidagi muvozanatni topish muhimligini ta'kidlaydi.

Britaniyalik takvondo ustasi Rebekka Makgovan esa maydonga chiqishdan oldin Panic! At The Disco guruhining "High Hopes" hamda Red Hot Chili Peppers'ning "Can't Stop" taronalarini tanlaydi. 24 yoshli sportchining aytishicha, bu qo'shiqlar unga qiyin damlarda taslim bo'lmaslik va musobaqaga tayyorgarlik ko'rish uchun kuch bag'ishlaydi.

Breyk-dans bo'yicha AQSh sharafini himoya qilayotgan Logan Edra o'tgan asrning 80-yillaridagi hip-hop musiqalarini afzal ko'radi. 21 yoshli B-Girl Logistx taxallusi bilan tanilgan sportchi Malcolm McLaren'ning 1983-yilgi "World's Famous" taronasini tinglab, breyk-dans asoschilarini yodga oladi va musiqa avlodlarni bog'lashini ta'kidlaydi.

Britaniyalik yana bir takvondochi Bradly Sinden esa Kanye West va Daft Punk tomonidan yozilgan "Stronger" qo'shig'i ostida jangovar ruhga kiradi. 25 yoshli sportchi bu taronani 2008-yilda suratga olingan "Never Back Down" filmining yakuniy sahnasidan so'ng yoqtirib qolganini bildirdi.