KREMLIN zararli dasturi Ethereum'dan foydalanmoqda 🛡

KREMLIN deb ataluvchi kiberxavfsizlik tahdidi Braziliyadagi bank foydalanuvchilariga qarshi qaratilgan yirik kampaniyalarda Ethereum smart-kontraktlaridan foydalanayotgani ma'lum bo'ldi. Mutaxassislar ushbu zararli dastur brauzerlarning xavfsizlik sozlamalarini chetlab o'tib, foydalanuvchilarning maxfiy ma'lumotlari, kuki fayllari va seans tokenlarini o'g'irlashini aniqlashdi.

Tadqiqot natijalariga ko'ra, zararli dastur operatorlari boshqaruv serverlari manzillarini o'zgartirish uchun Ethereum blokcheynidan foydalanmoqda. Dasturiy ta'minotning o'zini o'zgartirmasdan turib, tarmoqdagi qiymatlarni yangilash orqali hujum infratuzilmasini boshqarish imkoniyati yaratilgan. Bu usul blokcheyndan ma'lumot almashish vositasi sifatida foydalanishga asoslangan bo'lib, Ethereum konsensus tizimiga hech qanday tahdid solmaydi.

Elastic Security Labs va SlowMist kompaniyalari ushbu faoliyatni o'rganib chiqib, bir nechta shubhali smart-kontraktlarni aniqlashdi. Ularning ma'lumotlariga ko'ra, zararlangan tizimlarning mutlaq qismi Braziliyada joylashgan va hujumlar asosan portugal tilidagi soxta xabarlar orqali amalga oshirilmoqda. Nomiga qaramay, mutaxassislar ushbu kampaniyaning Rossiya davlatiga aloqasi yoqligini tasdiqlashdi.

Zararli dastur Chromium asosidagi brauzerlarning xavfsizlik sozlamalarini manipulyatsiya qilish orqali foydalanuvchining roziligisiz kengaytmalarni o'rnatishga qodir. Mutaxassislar kriptovalyuta hamyonlari va tarmoq tranzaksiyalarini kuzatish jarayonida ushbu operatsiya bilan bog'liq o'nlab USDT o'tkazmalarini ham qayd etishgan.