АҚШ аҳолисининг 40%дан ортиғи эмланишни хоҳламаяпти 💉

Америка Қўшма Штатлари аҳолисининг қарийб 41 фоизи коронавирус инфекциясига қарши эмлашдан ўтишни истамаётгани маълум бўлди. Бу ҳақда The Hill нашри Ҳарвард Америка сиёсий тадқиқотлар маркази ҳамда Harris Poll компанияси томонидан ўтказилган махсус сўров натижаларига таяниб хабар берди. Ушбу тадқиқот жами 2006 нафар респондентни қамраб олган.

Сўровнома қатнашчиларининг қолган 59 фоизи коронавирусга қарши эмланиш тарафдори эканини билдирган. Бироқ вакцинациядан бош тортаётган фуқароларнинг фикрлари таҳлил қилинганда, уларнинг асосий сабаблари аниқланди. Жумладан, эмланишни истамаганларнинг 66 фоизи препаратнинг турли ножўя таъсирларидан қўрқишини айтган бўлса, 33 фоизи вакциналарни самарасиз деб ҳисоблашини маълум қилган.

The Hill нашрининг қайд этишича, мамлакатда пандемияга қарши кураш жараёнида муайян ютуқларга эришилган бўлса-да, тиббиёт мутахассислари янги пайдо бўлаётган штаммлар бутун саъй-ҳаракатларни хавф остида қолдириши мумкинлигидан огоҳлантирмоқда. Айни пайтда АҚШда бир нечта дори воситалари фойдаланиш учун тасдиқланган. Хусусан, ўтган ҳафтада АҚШ озиқ-овқат ва дори маҳсулотлари сифатини санитар назорат қилиш бошқармаси Johnson & Johnson компаниясининг вакцинасидан фойдаланишни маъқуллаган эди. Ундан олдинроқ эса Pfizer-BioNTech ҳамда Moderna компанияларининг вакциналари ҳам тасдиқланганди.

Маълумот ўрнида эслатиб ўтамиз, пандемия бошлангандан бери АҚШда коронавирус юқтириб олиш билан боғлиқ ҳолатлар умумий сони 29,3 миллиондан ошиб кетди. Шу билан бирга, ушбу хасталик оқибатида мамлакатда 527 мингдан зиёд бемор вафот этган.