🌐 DDoS hujumlari kuchayib, ommalashmoqda

2022-yil davomida global miqyosda kuzatilgan DDoS hujumlari nafaqat ko'paydi, balki sezilarli darajada kuchaydi va murakkablashdi. Radware kompaniyasi e'lon qilgan tahliliy ma'lumotlarga ko'ra, oldingi yilga nisbatan xurujlar chastotasi, hajmi va davomiyligi bo'yicha ham keskin o'sish qayd etilgan. Mutaxassislar ushbu holatni umumiy raqamlashtirish jarayonlari, Ukrainadagi urush, shuningdek pandemiya davrida masofaviy ishlash uchun ommalashgan yangi xizmatlar va zaifliklar qoldig'i bilan izohlaydilar. Dunyo davlatlari o'rtasidagi siyosiy tanglik ham kiberjosuslik va hujumlarning ko'payishiga turtki bo'lmoqda.

Radware tahdidlar bo'yicha bo'limi direktori Paskal Giyinensning ta'kidlashicha, kiberxavfsizlik sohasida barcha ko'rsatkichlar bo'yicha o'sish kuzatilmoqda. Ziyon yetkazuvchi aksiyalar ko'lami, quvvati va murakkabligi jihatidan tez sur'atlar bilan rivojlanmoqda. Bundan tashqari, xavfsizlik mutaxassislari bunday hujumlarni uyushtirish ancha arzonlashganini qayd etishmoqda. Hozirda DDoS xizmatlari juda arzon narxlarda maxsus taklif sifatida ham sotilmoqda.

Statistik ma'lumotlarga ko'ra, 2022 yilda dunyo bo'ylab DDoS hujumlari soni 150 foizga oshgan. Shimoliy va Janubiy Amerikada bu ko'rsatkich 212 foizni tashkil qilgan bo'lsa, xurujlarning yarmidan ko'pi Yevropa, Yaqin Sharq va Afrika mintaqasidagi tashkilotlarga qaratilgan. Hujumlar chastotasi ham tashvishlanarli darajada o'sib, 2022 yilning oxirgi choragida tashkilotlar kuniga o'rtacha 29 tadan ortiq hujumni bartaraf etishga majbur bo'lgan.

Global hajm jihatidan ham sezilarli o'sish kuzatilib, umumiy ko'rsatkich 4,44 petabaytni tashkil etdi, bu o'tgan yilga nisbatan 32 foizga ko'pdir. Eng yirik qayd etilgan hujum quvvati 1,46 terabit sekundiga yetib, 2021 yildagi eng yuqori ko'rsatkichdan deyarli uch baravar oshib ketdi. Eng uzoq davom etgan xurujlar esa ma'lum bir tarmoq diapazonida qayd etildi.