Hamkorbank sof foydasi 29%ga oshdi 📈

Hamkorbank o‘zining choraklik hisobotini e’lon qildi va joriy yilning boshida yuqori moliyaviy natijalarga erishganini ma’lum qildi. Unga ko‘ra, 2024-yilning birinchi choragi yakunlariga ko‘ra bankning sof foydasi 319,4 milliard so‘mga yetdi. Bu o‘tgan yilning mos davridagi ko‘rsatkichga nisbatan 29 foizga ko‘p demakdir.

Bankning daromadlari ham sezilarli darajada kengaydi. Xususan, foizli daromadlar 40,4 foizga oshib, 949,1 milliard so‘mni tashkil etdi. Shu bilan birga, foizsiz daromadlar hajmi ham keskin o‘sish ko‘rsatib, 88 foizga ko‘paydi va 1,9 trillion so‘mga yetdi.

Moliyaviy ko‘rsatkichlarning umumiy hajmi ham yuqori sur’atlarda o‘smoqda. Xususan, hisobot davri yakuniga ko‘ra Hamkorbank aktivlari 21,7 trillion so‘mni tashkil etdi. Bu o‘tgan yilning shu davriga nisbatan 29,8 foizga ko‘pdir. Shuningdek, bank kapitali ham 44,7 foizga kengayib, 4,1 trillion so‘mga yetdi.

Markaziy bank taqdim etgan ma’lumotlarga ko‘ra, 2024-yilning 1-mart holatiga ko‘ra bankning kredit portfeli 16,4 trillion so‘mni tashkil etgan va yillik o‘sish 41,1 foizni tashkil etgan. Shu bilan birga, kredit portfelida muammoli kreditlar (NPL) ulushi o‘tgan davrdagi 0,6 foizdan 0,7 foizga biroz oshgani qayd etildi.