Xitoyning 6-avlod qiruvchi uzoqdan ko'rindi ✈️

Xitoy o'zining mudofaa sanoatini jadal rivojlantirib, so'nggi yillarda qator muhim muvaffaqiyatlarga erishayotganini ko'rsatmoqda. Hozirda mamlakatga tegishli ekani aytilayotgan oltinchi avlod jangovar samolyoti J-20 qiruvchisi bilan birgalikda sinov parvozini o'tkazgani ma'lum bo'ldi. Ushbu kutilmagan holat mutaxassislar va kuzatuvchilarning e'tiborini darhol o'ziga tortdi.

Orqaga nazar tashlasak, 2019 yilda Chengdu Aerospace Corporation bosh konstruktori doktor Van Xayfeng Xitoyning oltinchi avlod uchish apparatlari bo'yicha dastlabki tadqiqotlarini tasdiqlagan edi. O'shanda u mazkur texnologiyalar 2035 yilga kelib to'liq ishga tushishini taxmin qilgan. Ma'lumotlarga ko'ra, Chengdu Aerospace Corp 2018 yilda yangi avlod qiruvchi samolyoti uchun sakkizta loyihani taklif qilgan bo'lib, ulardan to'rttasi shamol naychalarida sinalgan. Shuningdek, Xitoy Aviatsiya Sanoati Korporatsiyasi 2023 yilda olmos shaklidagi va dikey quyruqsiz qiruvchi konsepsiyasini ommaga namoyish etgandi.

Tarqalgan suratlar va kadrlarga tayanib baho berganda, Xitoy bu safargi loyihasida yuqori darajadagi yashirinlik xususiyatiga asosiy e'tibor qaratganini ko'rish mumkin. Samolyotdagi dikey quyruq qismining yo'qligi bu taxminni bevosita tasdiqlaydi. Bundan tashqari, uning qanotlari to'g'ridan-to'g'ri uchuvchi kabinasi boshlanadigan qismgacha uzayib boradi.

An'anaviy uchuvchi qanot tuzilishidan ko'ra ko'proq uchburchak shaklni eslatuvchi bu samolyotning qurol bo'linmalari to'g'ridan-to'g'ri korpus ichida joylashtirilgan. Uning aniq uzunligi haqida hozircha qat'iy fikr bildirish qiyin bo'lsa-da, bu sirli apparat unchalik kichik emasligini payqash qiyin emas. Orqa fonda turganiga qaramay, uzunligi 20 metr va qanot kengligi 13 metr bo'lgan J-20 qiruvchisi bilan qiyoslanganda u deyarli bir xil o'lchamga ega ekanligi ko'zga tashlanadi.