AQSh MTR: Binance orqali 1,5 mlrd $ yuvilgan 🚨

AQSh Adliya vazirligining maʼlumotiga koʻra, raqamli aktivlarni boshqarish xizmati sifatida tanilgan Blessed Trust hamda tovar brokeri Hexa Whale Trading kompaniyalari Eron neftini sotib olgan xitoylik xaridorlarning mablagʻlarini oʻtkazish uchun yashirin kanal vazifasini bajargan. Ushbu sxema orqali jami 1,5 milliard dollarlik daromad yuvilgani aytilmoqda.

Mablagʻlar Binance birjasidagi korporativ akkauntlardan yechib olinib, nozorat qilinadigan hamyonlar tarmogʻi orqali aylantirilgan. AQSh rasmiylarining taʼkidlashicha, pullarning bir qismi Eronning eng yirik Nobitex platformasiga, boshqa qismi esa Islom Inqilobi Qoʻriqchilari Korpusiga aloqador kompaniyalarga yuborilgan.

Tergov organlari tranzaksiyalarni kuzatishni qiyinlashtirish maqsadida murakkab manzillar zanjiridan foydalanilganini aniqlagan. Shuningdek, oʻn millionlab dollarlik operatsiyalarni amalga oshirish jarayonida AQSh banklari ham jalb etilgani maʼlum qilindi.

AQSh prokuraturasi Binance birjasining oʻziga nisbatan ayblov eʼlon qilmagan. Birja vakillari mazkur kompaniyalarning hisoblarini Adliya vazirligi rasmiy bayonotigacha bloklab qoʻyganini bildirdi. Binance rahbariyati sanksiya rejimini buzish holatlariga nisbatan murosasiz siyosat yuritishini va huquq-tartibot idoralari bilan hamkorlik qilishini taʼkidladi.

Avvalroq The Wall Street Journal nashri eronlik moliyachi Babak Zanjani Eron hukumatini moliyalashtirish uchun Binance birjasidan foylangani haqida yozgan edi. Ushbu jurnalistik surishtiruv birjaning oʻz komplayens xizmati maʼlumotlariga ham tayangan.