Apple o'zining ilk buklama telefonini taqdim etdi 📱

Samsung bozorda ilk buklama ekranli telefonni namoyish etganidan to'qqiz avlod va yetti yil o'tib, Apple kompaniyasi o'zining ilk buklama smartfoni — iPhone Duo'ni rasman taqdim etdi. Taqdimot marosimida yangi rahbar John Ternus boshqa ishlab chiqaruvchilarning qurilmalarini tanqid qilib, Apple bu borada mukammal yechim ustida ishlaganini ta'kidladi.

iPhone Duo kitob shaklida ochiladigan dizaynga ega bo'lib, uning tashqi tomonida 5,4 dyuymli, ochilganda эsa 7,6 dyuymli ichki Super Retina XDR ekranlari joylashgan. Har ikki ekran ham ProMotion texnologiyasi, doimiy yoniq displey va eng yuqori cho'qqida 3 000 nit yorqinlikni qo'llab-quvvatlaydi. Tashqi panel oddiy telefon kabi qulay foydalanish imkonini bersa, ichki ekran standart iPhone modellariga nisbatan sezilarli darajada katta maydonni taqdim etadi.

Qurilma pasport shaklini eslatuvchi assimetrik korpusga ega bo'lib, uning ikki burchagi yumshatilgan. Muhandislar ekranlar nisbatini bir xil qilib ishlagan, natijada ilovalar bir ekrandan ikkinchisiga o'tganda o'z shaklini o'zgartirmaydi. Beshinchi darajali titandan yasalgan korpus bir parcha qilib ishlangan bo'lib, uning qalinligi ochiq holatda 5,2 mm, yopiq holatda esa 11,3 mm ni tashkil etadi. Smartfonning og'irligi 254 grammga teng bo'lib, u yulduzsimon oq va tungi osmon ranglarida sotuvga chiqadi.

Texnik jihatdan iPhone Duo eng so'nggi 2 nanometrli Apple A20 Pro protsessori, 7 yadroli grafik tezlatkich va 256 gigabaytdan 2 terabaytgacha bo'lgan xotira turlari bilan jihozlangan. Orqa kamerada ikkita 48 megapikselli modul mavjud bo'lib, telefoto obyektiv kiritilmagan. Old kameralar sifatida esa tashqarida 12 megapikselli Center Stage va ichki ekranda FaceTime kamerasi o'rnatilgan.