Rossiya Markaziy banki kriptovalyutalarni xavf deb atadi 📉

Rossiya Markaziy banki mamlakat moliya bozorida raqamli aktivlar va steykoinlar bilan bog'liq jiddiy xavf-xatarlar mavjudligini ma'lum qildi. Regulyatorning ta'kidlashicha, bunday vositalar kelgusida aholi tomonidan milliy valyuta o'rnida ishlatila boshlash ehtimoli mavjud. Markaziy bank bu haqda o'zining moliyaviy bozor rivojlanishiga bag'ishlangan yillik sharhida batafsil to'xtalib o'tdi.

Hisobotda keltirilishicha, kriptovalyutalarga qilingan investitsiyalar barcha mablag'larning butunlay kuvib ketish xavfini o'z ichiga oladi. An'anaviy moliyaviy vositalardan farqli o'laroq, bu turdagi "pul surragatlari" ko'pincha aniq ta'minotga yoki mas'ul tarafga ega emas. Natijada, qiymat keskin tushib ketgan taqdirda ham, investorlarning da'vo qilish uchun hech qanday kafolati qolmaydi.

Shuningdek, markaziy bank xodimlarining fikricha, markazlashmagan tarmoqlar orqali amalga oshiriladigan anonim tranzaksiyalar noqonuniy faoliyat xavfini oshiradi. Transchegaraviy xususiyatga ega bo'lgan bunday bozorlarni bitta davlat doirasida to'liq nazorat qilish qiyinligi ta'kidlandi. Jahon miqyosida yagona yondashuvning yo'qligi esa muayyan tartibga solinmagan segmentlarning kengayishiga sharoit yaratadi.

Ushbu ogohlantirish Rossiyada markaziy bank nazorati ostidagi tartibga solinadigan ichki kriptovalyuta bozori ochilganidan ko'p o'tmay e'lon qilindi. Eslatib o'tamiz, sentabr oyining boshida mamlakatda kriptovalyutalar savdosi, saqlanishi va transchegaraviy hisob-kitoblarini tartibga soluvchi ilk tizim ish boshlagan edi.