Sifu o'yini uchun yangilanishlar 🎮

Fevral oyining boshlarida qo'l janglariga bag'ishlangan qiziqarli Sifu ekshn o'yini keng omma e'tiboriga havola etildi. Jurnalistlar va oddiy geymerlar ushbu yangi mahsulotni, xususan, qahramonning qarishi bilan bog'liq noyob mexanikasini iliq kutib olishdi. Shunga qaramay, auditoriyaning bir qismi jangari janridagi ushbu loyihaning murakkabligi yuqori ekanligidan noroziligini bildirgandi.

Dastlabki tanqidlardan so'ng Sloclap studiyasi o'yinchilarning fikrlarini inobatga olishga qaror qildi. Ijodkorlar Twitter tarmog'ida o'yin uchun tayyorlanayotgan kelgusi yangilanishlar jadvalini ma'lum qilishdi. Unga ko'ra, bahor mavsumida qiyinlik darajasini tanlash imkoniyati, ilg'or mashg'ulot rejimi va liboslar tanlovi qo'shiladi. Yozda esa ochko tizimi, o'yin jarayoni modifikatorlari hamda yangi kiyim taqdim etiladi.

Kuz oylarida janglarni yozib olish uchun mo'ljallangan Replay Editor, shuningdek, qo'shimcha liboslar va modifikatorlar paydo bo'lishi rejalashtirilgan. Qish faslida esa yangi Arenas rejimi, maxsus kostyumlar va modifikatorlar joriy etiladi.

Eslatib o'tamiz, Sifu dastlab joriy yilning 6-fevralida faqat raqamli formatda kompyuterlar va konsollar uchun chiqarilgan edi. Yangi kontentlar to'plamining ilk relizi Vengeance Edition disk versiyasi sotuvga chiqadigan kun — 3-mayga belgilangan.