Radeon 880M OpenCL testida mag'lub bo'ldi 💻

AMD kompaniyasining Strix Point turkumidagi APU protsessorlari tarkibiga kiruvchi yangi RDNA 3.5 grafik yadrolari texnologiya ixlosmandlarida katta qiziqish uyg'otmoqda. Xususan, Ryzen AI 9 365 va AI 9 HX 370 protsessorlarida joylashgan Radeon 880M hamda Radeon 890M grafikasi boshlang'ich darajadagi diskret videokartalar darajasidagi imkoniyatlarni taqdim etishi kutilgan edi. Yaqinda tarqalgan sizdirilgan ma'lumotlar ham bu taxminlarni tasdiqlagandek bo'lgandi.

Jumladan, Ryzen AI 9 HX 370 ichidagi Radeon 890M OpenCL benchmark testida 43 000 ballga yaqin natija qayd etgani ko'rilgan edi. Bu ko'rsatkich uni GeForce RTX 2050 kabi diskret kartalar darajasiga olib chiqib, hatto RX 580 dan ham ustun ekanini ko'rsatgandi. Yangi arxitektura evaziga Radeon 880M ham nazariy jihatdan eski Radeon 780M dan sezilarli darajada tezroq ishlashi kerak edi. Hatto ASUS kompaniyasi o'tgan haftada bu iGPU 3DMark Time Spy testida Radeon 780M dan 15 foizga yaxshiroq natija ko'rsatishini da'vo qilgan edi.

Biroq, Geekbench ma'lumotlar bazasida paydo bo'lgan yangi Radeon 880M OpenCL natijasi ko'pchilikni biroz hafsalasi pir qildi. ASUS Zenbook S16 noutbuki va Ryzen AI 9 365 APU bazasida sinovdan o'tgan Radeon 880M atigi 30 521 ball to'pladi. Taqqoslash uchun, eng tezkor Radeon 780M natijasi 31 337 ballni tashkil etib, yangi modeldan 3 foizga oldinda ekanini ko'rsatdi.

Natijada Radeon 880M o'zidan oldingi avlod bilan deyarli bir xil darajada ekani ma'lum bo'ldi. Bu ko'rsatkich Intel Arc iGPU bilan ham raqobatlashishini bildiradi. Biroq bu natijaga shubha bilan qarash lozim, chunki sinovdan o'tgan Zenbook S16 sekin ishlaydigan 1,868 MT/s tezlikdagi DDR5 xotirasi bilan jihozlangan edi. Videoxotiraga ega bo'lmagan va operativ xotiradan foydalanadigan iGPU uchun sekin xotira katta to'siq hisoblanadi. Shuningdek, noutbukning quvvat rejimi va TDP cheklovlari ham natijaga ta'sir ko'rsatgan bo'lishi mumkin.