📉 Intel 15 ming xodimini ishdan bo'shatadi

Dunyodagi taniqli texnologiya gigantlaridan biri bo'lgan Intel joriy yil yakuniga qadar o'z xodimlarining 15 foizini, aniqrog'i 15 000 nafar mutaxassisni ishdan bo'shatishini e'lon qildi. Ushbu keskin chora kompaniyaga xarajatlarni 10 milliard dollarga qisqartirish imkonini berishi kutilmoqda. Shuningdek, to'rtinchi chorakda aksiya dividendlari to'xtatilishi ham rejalashtirilgan.

Bunday qarorga kelinishiga 2024-yilning ikkinchi choragi bo'yicha e'lon qilingan moliyaviy hisobotlar sabab bo'ldi. Unga ko'ra, har bir aksiya uchun daromad (EPS) ko'rsatkichi -0,38 dollarni tashkil etgan. Ma'lumotlarga ko'ra, Data Center va AI, Network va Edge, Altera hamda Mobileye kabi yo'nalishlar past ko'rsatkichlar qayd etgan. Shu bilan birga, Client Computing Group (CCG) bo'linmasi 2023-yil dekabridan beri 15 milliondan ortiq sun'iy intellekt kompyuterlarini yetkazib bergan va uning daromadi o'tgan yilning shu davriga nisbatan 9 foizga oshgan.

Kompaniya bosh direktori Pat Gelsinger 2024-yil 1-avgust kuni e'lon qilingan ikkinchi chorak natijalaridan so'ng ushbu o'zgarishlarni ma'lum qildi. Uning so'zlariga ko'ra, daromadlar kutilgan darajada o'smagan, sun'iy intellekt kabi tendentsiyalardan hali to'liq foyda olinmagan, xarajatlar esa o'ta yuqori va foyda marjasi pastligicha qolmoqda.

Mutaxassislar 12,8 milliard dollarlik yaxshi chorak daromadiga qaramay, Intel nima uchun bunday qadam qo'yayotganiga e'tibor qaratishmoqda. Gap shundaki, Intel 18A zavodlariga ko'p mablag' sarflangani va ayrim mahsulot segmentlarining past natijalari 1,6 milliard dollarlik sof zarar keltirib chiqargan. Shuningdek, Intel 18A tugunlari ishlab chiqarish liniyalarining qurilishi deyarli yakunlangani sababli, bosh direktor kapital xarajatlarni avvalgi proginlarga nisbatan 20 foizdan ko'proqqa kamaytirishni rejalashtirmoqda.