REvil xakerlari 6 yilgacha ozodlikdan mahrum etildi ⚖️

Sankt-Peterburg garnizon harbiy sudi REvil xakerlik guruhining taxminiy a'zosi bo‘lgan to‘rt nafar fuqaroni aybdor deb topib, ularga nisbatan 4,5 yildan 6 yilgacha ozodlikdan mahrum qilish jazosini tayinladi. Sudlanuvchilar zararli dasturiy ta'minotlarni tarqatish hamda to‘lov vositalarining noqonuniy muomalasi kabi qilmishlarda aybdor deb topildi. Hukm qilinganlar orasida Artem Zaec, Aleksey Malozemov, Daniil Puzyrevskiy va Ruslan Xansyarov bor bo‘lib, ularning har biri umumiy yoki qattiq tartibli koloniyalarga yuborildi.

Ushbu jinoiy guruh faoliyati haqidagi ma'lumotlar huquq-tartibot idoralariga AQShdan kelib tushgan murojaatdan so‘ng ma'lum bo‘lgan edi. Xorijiy hamkorlar xakerlar yetakchisining chet ellik yuqori texnologiyali kompaniyalar axborot resurslariga qilingan hujumlarga aloqadorligini ma'lum qilgandi. Dastlab ushbu ish bo‘yicha Rossiyada 14 kishi qo‘lga olingan bo‘lsa-da, oxir-oqibat sud oldiga sakkiz nafar ayblanuvchi kelib tushdi.

Qolgan to‘rt nafar shaxsga nisbatan esa kompyuter ma'lumotlariga noqonuniy kirish moddasi bo‘yicha alohida jinoyat ishi qo‘zg‘atilib, Bosh prokuraturaga yuborilgan. Tergov davomida ayblanuvchilarga AQShda noma'lum shaxslardan masofadan turib amalga oshirilgan ikkita mablag‘ o‘g‘irligi aybi qo‘yilgan, biroq ish materiallarida jabrlanuvchilarning arizalari ham, zarur miqdordagi zarar baholari ham mavjud emas.

2022 yil boshida hibsga olinganlar kripto-tovlamachilik, bank hisoblaridan mablag‘larni o‘g‘irlash va ularni naqdlashtirish ishlarida gumon qilingan edi. Biroq tergov jarayonida AQSh maxsus xizmatlari hamkorlikdan bosh tortgani va jabrlangan chet elliklar topilmagani sababli, ayblovni isbotlash qiyin kechdi. Shunga qaramay, o‘tkazilgan ekspertizalar davomida musodara qilingan mablag‘lar, jumladan millionlab rubl va valyutalar haqiqiy ekanligi tasdiqlandi.